O‘zbekiston Respublikasi Mudofaa vazirligi

Mazkur musobaqalar oldidan shaxsiy tarkibning tayyorgarlik darajasini tekshirish, final bellashuvlariga eng sara ishtirokchilarni tanlab olish maqsadida Shimoli-gʻarbiy harbiy okrugda ishtirokchilar soni 400 nafardan ziyod 10 ta jamoa bilan sportning harbiy-amaliy va olimpia turlari boʻyicha umumarmiya sport  musobaqalarining saralash bosqichi oʻtkazildi.

Taʼkidlash joizki, okrug tasarrufidagi harbiy qism va muassasalarda yurt himoyachilarining jismoniy tayyorgarlik mashgʻulotlari va sport bilan muntazam shugʻullanishi uchun barcha sharoitlar yaratilib, ularni tashkil etish uchun malakali mutaxassislar jalb etilmoqda.   

Musobaqaning ilk kunidan ishtirokchilar “Armiya biatloni”da kuch sinashdi. Bellashuv shartiga koʻra, har jamoadan 3 nafardan ishtirokchi 4 kilometr masofaga kross yugurish davomida kichik kalibrli miltiqdan nishonlarni tik turgan va yotgan holatda yakson etishi, granatalarni uzoqqa uloqtirishi, nishonga pichoq sanchishi hamda toʻsiqlardan sakrab oʻtishi orqali harbiy xizmatchilarning mahorati sinovdan oʻtkazildi. 

“Tosh koʻtarish” musobaqasida ishtirokchilar shaxsiy, jamoaviy va shaxsiy-jamoaviy tarzda bellashib, 24 kilogram ogʻirlikdagi toshlarni ikki dastur boʻyicha — ikki toshni ikki qoʻl bilan koʻkrakdan koʻtarish va toshni birinchi va ikkinchi qoʻl bilan galma-gal koʻtarishlari shart. Bahslar 60, 65, 70, 75, 80, 85, 90 kilogram va 90 kilogramdan yuqori toifalariga ega harbiy sportchilar oʻrtasida oʻtkazildi. 

Merganlik, chidamlilik, chaqqonlik va kuch sifatlarini yanada rivojlantirish maqsadida tashkil etilgan oʻq otish bellashuvida qatnashuvchilar TOZ-8 kichik kalibrli sport miltigʻidan mashqlarni nizom qoidalariga koʻra bajarib, belgilangan nishonlarga qarata oʻq uzishdi. “Armiya qoʻl jangi” hamda “Kurash” boʻyicha oʻtkazilgan chempionatlarda Vatan himoyachilari kuch, chidamlilik va yuqori jismoniy tayyorgarligini namoyish etib, kuchli raqobat muhitini yaratdi.

“Pichoq uloqtirish” bahsida ishtirokchilar shaxsiy va jamoaviy tarkibda 3,5,7 va 9 metr uzoqlikdan taxtadan yasalgan nishon markaziga pichoqlarni mohirlik bilan sanchishi kerak boʻldi. Shuningdek, “Pichoq uloqtirish” bellashuvida jamoaviy tarkibda boʻlinma tarkibida bajarilgan pichoq bilan qoʻl jangi elementlari yuqori baholanadi.

“Ofitserlar uchkurashi” va “Harbiy-sport kompleksi koʻpkurashi” musobaqalari haqiqiy kasbiy sinov maydonlariga aylandi. Pistoletdan oʻq otish, 100 metr, 1, 2 va 3 kilometr masofalarga yugurish, turnikda tortilish hamda toʻsiqli yoʻlakdan oʻtish kabi shartlarda bellashgan harbiy xizmatchilar jismoniy tayyorgarligi bilan birga ruhiy barqarorligini namoyish etishdi. “Yengil atletika” va “Badminton” musobaqalarida bellashgan jamoa ishtirokchilari gʻalabaga boʻlgan kuchli ishtiyoqi sabab, bahslar qiziqarli kechdi.

Shiddatli va murosasiz kechgan bahslar harbiy xizmatchilarning yuksak jismoniy tayyorgarlikka ega ekanligini isbotlab, armiyada sportning harbiy-amaliy va olimpia turlari ommalashganini ko‘rsatdi.

Bellashuvlar yakunlari boʻyicha gʻolib va sovrindorlar harbiy okrug qoʻmondonligi tomonidan diplom va medallar bilan taqdirlandi. Faxrli 1-oʻrinni qoʻlga kiritgan ishtirokchilar Mudofaa vazirligi miqyosida boʻlib oʻtadigan musobaqaga yoʻllanmaga ega boʻlishdi. 

Shimoli-gʻarbiy harbiy okrug matbuot xizmati