Sharqiy harbiy okrug qo‘shinlarida umumarmiya sport musobaqalariga start berildi
2025-01-29 12:30:00 / Yangiliklar
Ta’kidlash joizki, ushbu musobaqa Mudofaa vazirligi miqyosida har ikki yilda bir marotaba, harbiy okrugda esa har yili o‘tkazilib, unda okrug tasarrufidagi harbiy qism va muassasalardan saralangan eng kuchli jamoalar bellashuvga kirishadi.
Musobaqaning asosiy maqsadi harbiy xizmatchilarning jismoniy tayyorgarligini mustahkamlash, jangovar shaylikni oshirish va harbiy sportchilar safini kengaytirish bilan birga, harbiy xizmatchilarning erishayotgan yutuqlarini ommaga keng targ‘ib qilish, harbiy xizmatda jismoniy tayyorgarlikning muhim o‘ringa ega ekanligini ko‘rsatish hisoblanadi.
Musobaqa doirasida harbiy xizmatchilar sportning badminton, ko‘p kurash, yengil atletika, pichoq uloqtirish, og‘ir atletika, armiya qo‘l janggi, armiya biatloni, ofitserlar uch kurashi kabi bellashuvlarda o‘z imkoniyatlarini sinovdan o‘tkazmoqda.
Darhaqiqat, ushbu musobaqalar harbiy xizmatchilarni har tomonlama toblab, jismonan sog‘lom etib tarbiyalashga va Yangi O‘zbekiston armiyasining mustahkam poydevori bo‘lishiga xizmat qiladi.
Sharqiy harbiy okrug matbuot xizmati