O‘zbekiston Respublikasi Mudofaa vazirligi

Oʻtgan vaqt mobaynida mavzuga oid 30 ortiq tarixiy, badiiy hamda hujjatli filmlar, seriallar suratga olindi va «Buyuk Amir Temur», «Mendirman Jaloliddin», «Elparvar», «Sardor», «Vatan ostonasi», «Tinchlik ortida», «Matonat», «Hayot» kabi kinoasarlar nafaqat oʻzbek milliy kino sanoatida, balki harbiy vatanparvarlik idealogiyasini targʻib qilishda oʻziga xos natijalarga erishdi. Shunga qaramay bu natijalarni yutuq sifatida baholashga hali erta. Chunki hali bor imkoniyatlar ishga solinmadi. Boy tariximiz hamda mavjud imkoniyatlardan toʻlaqonli foydalansak, harbiy vatanparvarlik yoʻnalishida shoh asarlar suratga olinishi taʼminlanadi. Davlatimiz rahbarining 2021-yilgi «Kino sanʼati va sanoatini yangi bosqichga olib chiqish, sohani davlat tomonidan qoʻllab-quvvatlash tizimini yanada takomillashtirish toʻgʻrisida»gi Farmoni shunday deyishimizga asos boʻladi.

14-yanvar – Vatan himoyachilari kuni va Oʻzbekiston Respublikasi Qurolli Kuchlari tashkil etilganligining 33 yilligi bayrami arafasida bu borada amalga oshirilgan ishlar sonining bir yoʻla uchtaga oshganligiga guvoh boʻldik. Oʻzbekiston Respublikasi madaniyat vazirligi huzuridagi kinematografiya agentligi «Hujjatli va xronikal filmlar kinostudiyasi» davlat unitar korxonasi hamda mudofaa vazirligi hamkorligida «Yangi Oʻzbekiston kinosolnomasi» turkumi doirasida suratga olingan hujjatli filmlar premyerasi muxlislar eʼtiboriga namoyish etildi.

Rejissyor Saidolim Maʼsudxonov va ssenariy maullifi Shoyim Boʻtayev boshchiligidagi ijodiy guruh ishtirokida ekran yuzini koʻrgan «Zamonaviy harbiy institut», «Ulugʻvor qalb bilan qutlugʻ saflarga», «Yangi Oʻzbekiston lochinlarlari» hujjatli filmlari mamlakatimizdagi uchta oliy harbiy taʼlim muassasalari faoliyatidan hikoya qiladi. Shuning uchun mazkur uchta hujjatli filmning dastlabki tomoshabinlari ham deyarli Vatan himoyachilaridan iborat boʻldi.

Milliy kino sanʼati saroyida boʻlib oʻtgan premyera namoyishi jarayonida mutaxassislar ijodkorlar ishiga baho berildi. Kinematografiya agentligi va Mudofaa vazirligining esdalik sovgʻalari topshirildi. Ommaviy axborot vositalari xodimlari bilan uyushtirilgan intervyularda film qahramonlari sifatida ekranda gavdalangan ofitserlar, kursantlarning haqiqiy Vatan himoyachilariga xos jumlari yana bir marta jarangladi.

– Har doim parvozga xuddi soʻnggisiga chiqqanday chiqaman. Odam oʻzining oʻlishini bilsa, oʻlmaslik uchun qattiq harakat qiladi. Soʻnggi parvozdan qoʻrqmayman. Agar u Vatanim tinchligi yoʻlida boʻlsa.

Premyera «Yangi Oʻzbekiston lochinlarlari» hujjatli filmidagi Shermuhammad Toshmuhammedovning ushbu soʻzlari bilan yakunlandi. Shermuhammad. Bu ism unga Sariosiyo va Uzun voqealari qahramoni Shermuhammad Ashirov sharafiga berilgan. Uning xizmatdoshi, hozirda polkovnik unvonida xizmat burchini oʻtayotgan Bahodir Saliyev marhum doʻstining xotirasi uchun oʻgʻlini uning ismi bilan atagan. Bugungi kunda Oʻzbekiston Respublikasi harbiy aviatsiya instituti 5-bosqich kursanti Shermuhammad Toshmuhammedovning yuqoridagi soʻzlari tinchligimiz yoʻlida mardlarcha halok boʻlgan qahramonga munosib izdosh ekanligining haqiqiy isbotidir. Chunki oʻziga berilgan ismning ham, Vatanga sadoqat bilan xizmat qilishning masʼuliyatini ham har bir nafasida his qila oladigan yurt oʻgʻlonidir. Uning bosh rollardan birida talqin etilishini esa «Yangi Oʻzbekiston lochinlarlari» hujjatli filmi ijodkorlarining yutugʻi sifatida baholash mumkin.

Mudofaa vazirligi Axborot va ommaviy kommunikatsiyalar departamenti