Tasvirlarda vatanparvarlik
2025-01-04 15:20:00 / Yangiliklar
Sharqiy harbiy okrug Ma’naviyat-ma’rifat markazida O‘zbekiston Respublikasi Qurolli Kuchlari tashkil etilganining 33 yilligi hamda Vatan himoyachilari kuni munosabati bilan o‘tkazilgan tadbirlar doirasida “Mening armiyam – mening faxrim” mavzusida rasmlar tanlovi tashkil etildi. Ushbu tanlov “Yangi O‘zbekiston armiyasi - mamlakat tayanchi, xalqimiz faxri!” shiori ostida o‘tkazilib, harbiy xizmatchilar va ularning farzandlariga o‘z ijodiy qobiliyatlarini namoyish etish imkoniyatini taqdim etdi.
Tanlovda havaskor va professional ijodkorlar bo‘yoqlarda milliy armiyamiz, vatan himoyachilarining matonati hamda tinch va osuda kunlarimizni aks ettiruvchi asarlar yaratdilar. Har bir ijodiy ishda vatanparvarlik, milliy qadriyatlar va harbiy xizmatning muhim ahamiyati o‘z ifodasini topdi.
Tanlov davomida ishtirokchilar turli yosh toifalariga bo‘lingan holda baholandi. Ularning ijodiy ishlari hakamlar hay’ati tomonidan ko‘rib chiqildi. Hakamlar asarlarning mazmun-mohiyati, ijro mahorati va tasviriy san’at qoidalariga asoslangan holda tanlov g‘oliblarini aniqladilar. Yakunda eng yaxshi ijodiy ishlar alohida e’tirof etilib, g‘olib va sovrindorlar esdalik sovg‘alari hamda diplomlar bilan taqdirlandi.
Sharqiy harbiy okrug matbuot xizmati