Nukusda “Yosh harbiylar forumi” bo‘lib o‘tdi
2024-12-28 14:30:00 / Yangiliklar
Qoraqalpog‘iston Respublikasi Jo‘qorg‘i Kengesi va Vazirlar Kengashi, shuningdek, Shimoli-g‘arbiy harbiy okrug qo‘mondonligi, Nukus shahar hokimligi, O‘zbekiston Yoshlar ittifoqi, Yoshlar ishlari agentligi hamkorligida tashkil etilgan forumda yosh harbiy xizmatchilar, faxriylar hamda “Vatan tayanchi” otryadi a’zolari va bir guruh yoshlar ishtirok etdi.
Shimoli-g‘arbiy harbiy okrug qo‘shinlari qo‘mondonining o‘rinbosari hamda davra mehmonlari so‘zga chiqib, yaqinlashib kelayotgan Yangi yil bayrami bilan yig‘ilganlarni samimiy tabriklar ekan, forumning maqsad va vazifalari hamda 2024-yil davomida yoshlarga oid davlat siyosati yuzasidan amalga oshirilgan ishlar haqida ma’lumot berdi.
Davra davomida davlatimiz taraqqiyoti va rivojiga ulkan hissa qo‘shayotgan Qoraqalpog‘istonlik yoshlar nutq so‘zlab, orzu va maqsadlarga erishish yo‘lida o‘zlarining kerakli maslahat va tavsiyalarini berib o‘tishdi. “Mard o‘g‘lon” ordeni sohibi kichik serjant Asliddin Nurmatovning hayoti va xizmat yillaridagi yutuqlari yig‘ilish ishtirokchilarini ruhlantirdi.
Shimoli-g‘arbiy harbiy okrug tomonidan otaliqqa olingan yoshlar bilan amalga oshirilgan ishlarda faollik va jonbozlik ko‘rsatgan bir guruh yosh harbiylar okrug qo‘mondonligining esdalik sovg‘alari bilan taqdirlandi.
Tadbir so‘ngida O‘zbekiston davlat konservatoriyasi Nukus filiali orkestr jamoasi tomonidan konsert dasturi namoyish etildi.
Shimoli-g‘arbiy harbiy okrug matbuot xizmati