Qoraqalpog‘istonlik ota-onalar askar farzandlari bilan onlayn muloqot qildi
2024-12-27 11:20:00 / Yangiliklar
Nukus garnizoni Ma’naviyat va ma’rifat markazida bo‘lib o‘tdi. Qurolli Kuchlarimiz tashkil etilganining 33 yilligi hamda 14-yanvar – Vatan himoyachilari kuni munosabati bilan o‘tkazilgan teleko‘prikda Qoraqalpog‘iston Respublikasidan Samarqand viloyatiga harbiy xizmatga yuborilgan askarlar va Samarqand viloyatidan Nukus garnizonidagi harbiy qismlarda yigitlik burchini o‘tayotgan alpqomat yigitlarning yaqinlari bilan uchrashuv tashkil etildi.
“Askar ota-onalarini sharaflaymiz” nomli tadbir hayajonli daqiqalarga boy bo‘ldi. Ota-onalar farzandlari bilan diydorlasharkan, ko‘zlarida sevinch yoshlari bilan dilbandiga omad va zafarlar tilab qolishdi. Askarlar ham endi kechagi erka bola emas, balki egnidagi harbiy libosiga yarashiq so‘zi bor, haqiqiy Vatan o‘g‘loni bo‘lganini suhbat davomida sezilib turdi.
Videomuloqot yakunida bilimi, namunali xulqi va harbiy qismdagi faolligi bilan ajralib turgan askarlarning ota-onalari okrug qo‘mondonligining minnatdorchilik xati bilan taqdirlandi.
Shimoli-g‘arbiy harbiy okrug matbuot xizmati