“Harbiy qismda bir kun” loyihasi doirasida “Ochiq eshiklar kuni” o‘tkazildi
2024-12-26 18:55:00 / Yangiliklar
"Yangi Oʻzbekiston armiyasi-mamlakat tayanchi, xalqimiz faxri!" shiori ostida tashkil etilgan tadbirlarda yoshlarni harbiy-vatanparvarlik ruhida tarbiyalash, Vatanga muhabbati va sadoqatini mustahkamlash, ma’nan yetuk, barkamol inson sifatida shakllanishi hamda ular o‘rtasida jinoyatchilikni oldini olish maqsadida tashkil etilgan tadbirda talabalar, o‘quvchilar va otaliqqa olingan yoshlar ishtirok etdi.
Tadbir ishtirokchilari dastlab bugungi kunda milliy armiyamiz saflarida xizmat qilayotgan harbiy xizmatchilarga yaratilgan shart-sharoitlar bilan yaqindan tanishib, faxriylar va yurt himoyachilari bilan ochiq muloqotga kirishdi.
Qiziqarli savol-javoblar bilan kechgan samimiy suhbatlar davomida yoshlar Mudofaa vazirligi tomonidan olib borilayotgan bugungi islohotlardan bevosita boxabar bo‘lib, bu borada qo‘lga kiritilayotgan yutuqlar hamda oliy harbiy ta’lim muassasalari haqida batafsil ma’lumotlarga ega bo‘lishdi.
Shuningdek, mehmonlar harbiy qismlarning tarix muzeyi bilan tanishar ekan, tariximizning boy merosi, buyuk bobolarimizning harbiy yurishlari, ularning yurt tinchligi uchun qo‘shgan hissasi, janglardagi jasoratini yana bir bor yodga oldi.
Loyiha doirasidagi tadbirlar kunning ikkinchi qismida tashkil etilgan qurol-aslahalar namoyishi va ko‘rgazmali chiqishlari bilan yakunlandi.
Markaziy harbiy okrug matbuot xizmati