Yangi yil bayrami munosabati bilan joylarda arzonlashtirilgan oziq-ovqat yarmarkalari o‘tkazilmoqda
2024-12-26 16:50:00 / Yangiliklar
Harbiy xizmatchilar va ularning oila a’zolari bayramni yuqori kayfiyatda kutib olishlari uchun Mudofaa vazirligi tomonidan joylarda arzonlashtirilgan oziq-ovqat yarmarkalari tashkil etilmoqda.
Yarmarkalar davomida harbiy orkestr jamoalari jonli chiqishlari bilan tashrif buyuruvchilarga alohida zavq bag‘ishladi. Xaridorlar go‘sht, meva-sabzavot, sut mahsulotlari, shirinliklar va boshqa zarur oziq-ovqat mahsulotlarini arzonlashtirilgan narxlarda sotib olish imkoniga ega bo‘ldilar. Musiqa sadolari ostida xarid qilish nafaqat qulaylik, balki bayramning haqiqiy ruhiyatini baxsh etdi.
Yangi yil bayramiga tayyorgarlik ko‘rish jarayonida yurt himoyachilariga qulaylik yaratish maqsadida bunday yarmarkalar yana bir necha kun davomida faoliyat ko‘rsatishi rejalashtirilgan.
Mudofaa vazirligi Axborot va ommaviy kommunikatsiyalar departamenti