Nukus shahridagi Prezident maktabida “Harbiylar va yoshlar uchrashuvi” bo‘lib o‘tdi
2024-12-25 11:50:00 / Yangiliklar
Harbiy xizmatchilar va faxriylar, shuningdek, Qurolli Kuchlar akademiyasi tinglovchilari soʻnggi yillarda Qurolli Kuchlarda olib borilgan islohotlar, jumladan, bunyodkorlik ishlari, milliy armiyamiz jangovar qudratini oshirishga qaratilgan saʼy-harakatlar, harbiy ximzatchilar va ular oila aʼzolarining ijtimoiy himoyasi yoʻlida yaratilgan shart-sharoitlar haqida toʻlqinlanib gapirishdi. Oʻquvchi-yoshlarning qiziqtirgan savollariga atroflicha javoblar berildi.
Harbiy qism faxriy qorovul vzvodi tomonidan tayyorlangan koʻrgazmali chiqishlar, qoʻl jangi elementlari bilan bajarilgan mashqlar iqtidorli oʻquvchilarni hayratda qoldirdi. Nukus garnizoni Maʼnaviyat va maʼrifat markazi harbiy orkestri jamoasining konsert dasturlari esa tadbirning yanada hushkayfiyatda oʻtishiga xizmat qildi.
Bu kabi tadbirlar, Qoraqalpogʻiston Respublikasi boʻylab keng oʻtkazilishi yoʻlga qoʻyilgan boʻlib, ulardan biri qadim tarixga ega Xoʻjayli tumanining 500 nafarga yaqin yoshlari bilan vatanparvarlik gʻoyalari bilan sugʻorilgan festival tashkil etilib, unda hokimiyat, Yoshlar ittifoqi hamda Yoshlar ishlari agentligi, tuman Mudofaa ishlari boʻlimi vakillari hamda bir guruh harbiy xizmatchilar qatnashdi.
Shuningdek, tumandagi 15-sonli maktabda “Mardlik va jasorat” darslari ham oʻtkazilib, oʻquvchilarga milliy armiyamizda roʻy berayotgan koʻlamli oʻzgarishlar sabab yurtimiz jahon arenasida qudratli Qurolli Kuchlariga ega mamlakatlar qatoridan joy olayotgani alohida eʼtirof etildi. Kelgusida harbiy xizmatchi boʻlish istagidagi yoshlar uchun davlatimizda faoliyat yuritayotgan oliy harbiy taʼlim muassasalari, “Temurbeklar maktabi” va harbiy-akademik litseylar haqida maʼlumotlar berib oʻtildi.
Shimoli-gʻarbiy harbiy okrug matbuot xizmati