O‘zbekiston Respublikasi Mudofaa vazirligi

Mazkur hisobotni mudofaa vaziri oʻrinbosari general-mayor Hamdam Qarshiyev oʻqib eshittirdi. Unga ko‘ra, Oʻzbekiston Respublikasi Prezidenti – Qurolli Kuchlar Oliy Bosh qoʻmondoni tomonidan mamlakatimiz mudofaa qobiliyatini mustahkamlash boʻyicha belgilab berilgan vazifalarini soʻzsiz va sifatli ijrosini taʼminlash maqsadida Mudofaa vazirligida samarali ishlar olib borilayotganligi taʼkidlandi.

Jumladan, Qurolli Kuchlarimizning jangovar salohiyati yuqori darajaga koʻtarilganligi, milliy armiyamizning jangovar shayligi va tayyorgarligini oshirishda asosan rivojlangan xorijiy armiyalarning ijobiy tajribalari qoʻshinlarga tadbiq etilgani sababli oʻtgan yilga nisbatan jangovar shaylik tadbirlari 1,5 barobarga koʻpayganligi, qoʻmondonlik tarkibining kasbiy tayyorgarligini oshirishga erishilgani aytib oʻtildi.

Bunga misol tariqasida qoʻshinlardagi operativ tayyorgarlik tadbirlari hamkorlikdagi kuch tuzilmalarini keng jalb qilgan holda tashkil etilgani va bu borada xorijiy davlat armiyalari bilan hamkorlikda olib borilgan oʻquvlar hisobotda oʻz aksini topdi.

Yigʻilish qatnashchilariga oʻquvlarda asosiy eʼtibor strategik, operativ va operativ-taktik boʻgʻinlarda boʻlinmalar tomonidan yangi taktik harakatlar oʻzlashtirilishiga qaratilgani haqida maʼlumotlar ham yetkazildi.

Shuningdek, Mudofaa vazirligi “Avtomatlashtirilgan axborot tizimi va maʼlumotlar bazasi” axborot tizimining “Chaqiruv” tizimosti dasturi barcha mudofaa ishlari boshqarma va boʻlimlariga tadbiq qilinishi, elektron maʼlumotlar almashinuvi yoʻlga qoʻyilishi, Ichki ishlar vazirligining “Manzil”, Adliya vazirligi huzuridagi “Xorijga chiqish pasporti”, “Yoshlar balansi” hamda “Elektron hukumat” platformalari integratsiya qilinib, harbiy xizmatga majburlar, chaqiriluvchilarga oid maʼlumotlar elektron bazasi yaratilishi, Mudofaa ishlari organlarining fuqarolarga harbiy roʻyxatga kiritish, undan chiqarish faol davlat xizmatlarini koʻrsatish, ularga oid maʼlumotlarni taqdim qilish bilan bogʻliq masalalarda byurokratizm va boshqa toʻsiqlarga barham berilishi orqali fuqarolarga yengillik yaratilayotganligi taʼkidlandi.

Mudofaa vazirligi tizimida fuqarolarning murojaatlari bilan ishlash faoliyati yaxshi yoʻlga qoʻyilgan. 2024-yilning 11 oyida Mudofaa vazirligiga jismoniy va yuridik shaxslardan 3 241 ta murojaat kelib tushgan. Shundan 1 342 tasi ijobiy hal etilgan, 1 526 ta murojaatga huquqiy maslahat berilgan va 115 tasi oʻrganib chiqilmoqda.

Mudofaa vazirligi rahbariyati va masʼul xodimlari tomonidan oʻtkazilgan sayyor qabullarda 560 dan ziyod jismoniy va yuridik shaxslar qabul qilingan va ularga tegishli amaliy yordam koʻrsatilgan.

Oʻz navbatida, Mudofaa va xavfsizlik masalalari qoʻmitasining muhokama qilingan masalalar yuzasidan aniq takliflari aks etgan qarori qabul qilindi.

Qarorda Oʻzbekiston Respublikasi Prezidentining mudofaa salohiyatini mustahkamlash borasidagi farmon va qarorlarida belgilangan vazifalarning oʻz vaqtida, sifatli bajarilishini taʼminlash, rahbarlarning bu boradagi shaxsiy masʼuliyatini yanada oshirish zarurligi qayd etilgan.

Mudofaa vazirligi Axborot va ommaviy kommunikatsiyalar departamenti