O‘zbekiston Respublikasi Mudofaa vazirligi

2000-yil avgust oyida mustaqil O‘zbekiston davlat tuzumiga ola ko‘z bilan qaragan bir guruh g‘alamislar Surxondaryo viloyatining Sariosiyo va Uzun tumanlarida terrorchilik harakatlarini samarasiz amalga oshirdi. Chunki mamlakatimiz hududiga kalamush singari suqilib kirgan o‘sha g‘alamislar milliy armiyamizning mudofaa qudrati qanday ekanligiga baho berishdan yiroq edi. Shuning uchun g‘arazgo‘ylarning niyati qisqa muddat ichida yo‘qqa chiqarildi. Ming afsuski, janglarda bir qator yigitlarimiz yurt tinchligi yo‘lida halok bo‘ldi. Harbiy uchuvchi katta leytenant Narimon Abkelyamov ulardan biri edi.

 Qashqadaryo viloyati Shahrisabz  shahrida tug‘ilib o‘sgan Narimon Rossiya Federatsiyasining Viborg shahridagi fuqaro aviatsiyasi bilim yurtida tahsil olishiga qaramay bolalikdagi orzusi – harbiy uchuvchi bo‘lish uchun tinmay o‘qidi, izlandi. 1991-yil bilim yurtidagi tahsilini muvaffaqiyatli tugatib yurtimizga qaytdi. Xizmat faoliyatini Qo‘qon aeroportida bort-texnigi lavozimida boshladi. 1998—2000-yillar davomida Chirchiqdagi harbiy qismda vertolyot eskadrilyasi bort-texnigi sifatida harbiy xizmatini davom ettirgan. Sariosiyo va Uzun voqealarida dushmanga havodan zarba berish jarayonida jasoratini namoyish qildi. Ammo jangovar topshiriqni bajarish chog‘ida jangarilar tomonidan otilgan o‘q vertolyotning dvigateliga shikast yetkazdi. Boshqaruvni yo‘qotgan vertolyotni yerga qo‘ndirish paytida Narimon Abkelyamov qattiq yaralandi. Uning xizmatdosh do‘stlari esa qahramonlarcha halok bo‘ldi. Og‘ir yaranlangan Narimon o‘lim bilan yuzma-yuz kurashdi va 4 oydan keyin gospitalda vafot etdi. O‘limidan keyin O‘zbekiston Respublikasi Prezidentining farmoniga muvofiq “Jasorat” medali bilan taqdirlandi.

Kuni-kecha Narimon Abkelyamov xizmat burchini o‘tagan harbiy qismda qahramonning xotira burchagi ochildi. Chunki u bundan roppa-rosa 20 yil avval, ya’ni 2000-yil 20-dekabr kuni vafot etgandi. Xotira burchagining ochilish marosimida faxriylar, harbiy xizmatchilar, maktab o‘quvchilari bilan birga oila a’zolari ham ishtirok etdi. Tadbirda so‘zga chiqqanlar Vatan uchun jonini qurbon qilgan yurt o‘g‘lonlarining jasoratini abadiylashtirish ezgu ish ekanligini ta’kidladilar. Bugungi tinch-osuda hayotimiz Narimon singari yigitlarning qoni va shirin joni evaziga qo‘lga kiritilganligi yana bir bor yodga olindi. Shundan so‘ng katta leytenant Narimon Abkelyamovning turmush o‘rtog‘i III darajali serjant Luiza Abkelyamova, marhumning farzandi Ayder va xizmatdoshi tomonidan xotira burchagi davlatimiz madhiyasi sadolari ostida ochildi.

Xotira burchagining tantanali ochilish marosimidan keyin tadbir qatnashchilari aviatsiya muzeyiga tashrif buyurdilar. Maktab o‘quvchilari mustaqil O‘zbekiston harbiy aviatsiyasi tarixidan hikoya qiluvchi muzeydagi eksponatlar bilan tanishar ekanlar, mamlakatimiz tinchlig yo‘lida halok bo‘lgan boshqa harbiy uchuvchilar xotirasi qarshisida ta’zim qildilar.

Abkelyamovlar oilasi vakillari esa Narimonning nevarasi bo‘lmish 9 oylik Edem bilan esdalikka rasmga tushishdi. Turmush o‘rtog‘ining vafotidan keyin harbiy bo‘lishga ahd qilgan Luiza Abkelyamova ko‘rsatilgan e’tibor uchun barcha-barchaga minnatdorchilik bildirdi.

Asror RO‘ZIBOYEV, Mudofaa vazirligi Axborot va
ommaviy kommunikatsiyalar departamenti