O‘zbekiston Respublikasi Mudofaa vazirligi

“Jizzax tajribasi” asosida boshlangan yig‘in Qoraqalpog‘iston Respublikasi yoshlari orasida ham katta qiziqishga sabab bo‘lmoqda. Joriy yilning noyabr oyi oxirida boshlangan yig‘inning to‘rtinchi mavsumi ham o‘z nihoyasiga yetib, bu yil hisobidan 400 nafar qoraqalpog‘istonlik yoshlarning ta’lim-tarbiyasiga jiddiy ta’sir ko‘rsatish imkoni yaratildi.

Qoraqalpog‘iston Respublikasining barcha shahar va tumanlaridan kelgan yoshlar Nukus shahridagi Yoshlar markazi binosida kutib olinib, Shimoli-g‘arbiy harbiy okrugida joylashgan harbiy qismga tantanali kuzatildi. Harbiy qismda yig‘in ishtirokchilari tibbiy ko‘rikdan o‘tkazilib, ularga harbiy liboslar tarqatildi.

Yig‘in davomida 100 nafar band bo‘lmagan yoshlar Nukus shahridagi Mudofaa vazirligiga qarashli Qurilish sohasida malakali mutaxassislarni tayyorlash markazi mutaxassislarining ko‘magi bilan 15 dan ortiq kasb-hunarga o‘qitildi. Xususan, ular bilan dastlabki harbiy tayyorgarlik, ma’naviy-ma’rifiy tayyorgarlik, IT-texnologiyalari, tadbirkorlik hamda kasb-hunar, ya’ni, avtoservis xizmati, gipsokarton va profnastil, santexnik va chilangarlik, umumqurilish ishlarini o‘rganish bo‘yicha mashg‘ulotlar tashkil etildi.

Shuningdek, davlat va jamoat tashkilotlari, huquqni muhofaza etish organlari xodimlari tomonidan mafkuraviy immunitetni mustahkamlashga qaratilgan profilaktik tadbirlar, tajribali tadbirkorlar ishtirokida biznes forumlar tashkil etildi.

Bir so‘z bilan aytganda, “Jasorat maktabi” hayotini qaytadan  boshlamoqchi bo‘lgan jasoratli yoshlarni kashf etib, umr kitobida oydin hayot sari odimlashlari uchun dasturilamal bo‘lib xizmat qilmoqda.

“Jasorat maktabi” yig‘inining yopilish marosimida so‘z olganlar yig‘in bitiruvchilarini samimiy muborakbod etib, kelgusidagi hayot yo‘llarida omad va zafarlar tilab qolishdi.

Shimoli-g‘arbiy harbiy okrug matbuot xizmati