“Eng yaxshi kinolog” nomi aniqlanmoqda
2024-11-12 10:40:00 / Yangiliklar
Mudofaa vazirligi Mutaxassis va xizmat itlarini tayyorlash markazida start olgan “Men g‘olib” shiori ostidagi “Eng yaxshi kinolog” ko‘rik-tanlovi ham ana shu maqsadlarga xizmat qilgani bilan ahamiyatli bo‘ldi.
Ilk marotaba tashkil etilayotgan ushbu bellashuvlarda Mudofaa vazirligining harbiy okrug va muassasalardan jami 30 nafar harbiy xizmatchi va yana ularning shuncha xizmat itlari birinchilik uchun murosasiz kurash olib bormoqda.
Ishtirokchilar dastlab, xizmat itlari bilan 300 metr masofadagi maxsus to‘siqlarni birgalikda yengib o‘tish shartida mahoratlarini sinovdan o‘tkazdi. Bunda har bir harakat eʼtiborga olindi.
Taʼkidlash kerakki, shartlar haqiqatdan ham murakkab. Demak, yaxshi tayyorgarlik ko‘rmagan va o‘z malakasini oshirib kelmagan “sodiq do‘stlar” bunda ko‘zlagan marrani zabt eta olmaydi. Biroq bugun maydonda kurash olib borayotgan bu azamatlar o‘z kasbining ustasi, mahoratli, yetarli tajribaga ega mutaxassislar sanaladi.
Musobaqa beshta bosqichni o‘z ichiga oladi: “300 metrli masofaga to‘siqlarni xizmat iti bilan yengib o‘tgan holda yugurish”, “Bo‘ysunish”, “Iz-qidiruv yo‘nalishi”, “Kinolog mergan” hamda “Kinolog va xizmat itlari yo‘nalishlari bo‘yicha maxsus mashqlarni bajarish” kabi shartlardir.
Demak, qatnashchilarni hali oldinda bir-biridan murakkab va qiziqarli shartlar kutib turibdi.
Kapitan Shohruh Saidov, Mudofaa vazirligi
Axborot va ommaviy kommunikatsiyalar departamenti