O‘zbekiston Respublikasi Mudofaa vazirligi

Chirchiq dala o‘quv maydonlaridan birida “Eng ilg‘or otliq guruh” tanlovi bo‘lib o‘tdi. Dastavval harbiy qism, so‘ng harbiy okruglar va final bellashuvi Mudofaa vazirligi miqyosida o‘tkazilayotgan mazkur ko‘rik-tanlov uch bosqichda tashkillashtirildi.

Uzoq masofaga otda marafondan iborat birinchi bosqichda ishtirokchi chavandozlar daryodan va minali maydondan o‘tish, otliq dazor harakatlari, orientirlash, yaradorga birinchi yordam ko‘rsatish, yarador va o‘q-dorilarni tashish kabi topshiriqlarni bajardi. Ikkinchi bosqichda 3 kilometr masofada to‘siqlar yo‘lagidan o‘tish, o‘q otish, 4 kilometr masofada ot mingan holda saf va taktik vazifalarni bajarish, granata uloqtirish vazifalari o‘rin oldi. Uchinchi bosqich harbiy chavandozlarning xos bellashuvi bo‘lib, u ot poygasi estafetasi, jamoaviy uloq-ko‘pkari, ot ustida kurash, ot ustida nishonga kamondan, pistoletdan yoki pnevmatik quroldan o‘q otish mashqlaridan iborat. 

Ot qadimdan olis safarlarda, jangu-jadallarda, Vatanni bosqinchi dushmanlardan himoya qilishda yigitning eng yaqin do‘sti, yo‘ldoshi bo‘lgan. Shuning uchun ham tarix kitoblarida turklar ot ustida yurar, ot uzarinda uxlar va o‘lar edi, degan so‘zlar ko‘p bitilgan. Chavandoz bahodir yigitlar va ularning otlari haqida “Alpomish”, “Go‘ro‘g‘li”, “Avazxon”, “Semurug‘ va Bunyod”, “Siyovush” va boshqa xalq dostonlarida, ertak va matallarda ko‘plab ma’lumotlar uchraydi. Ergash Jumanbulbul o‘g‘lining “Qunduz va Yulduz” dostonida bir lavha bor: “Avazxon dushman askarlari bilan jang qilib, ko‘pini qirib tashlaydi. Oxiri o‘zi yarador bo‘lib, hushdan ketadi. Shunda uning oti G‘irot o‘z sohibining belbog‘idan tishlab, toqqa olib chiqib ketadi. Yov uni quvib yetolmaydi. Avazxon hushiga kelib, ko‘zini ochib qarasa G‘irot tepasida ko‘z yosh to‘kib turganmish. Shunda Avazxon G‘irotni: “Jonim G‘irot, molim G‘irot, seni mingan topgay murod” deb erkalagan ekan.

Sohibqiron Amir Temur ham chopqir otlarni juda qadrlagan. Uning davrida chavandozlarning martabasi ulug‘ bo‘lgan. “Oddiy sipohiylarga o‘z vazifasini o‘rinlatib bajarish sharti bilan maoshi mingan otining bahosida, bahodirlarning maoshi esa ikki ot bahosidan to‘rt ot bahosigacha tayin qilindi”, deyiladi tuzuklarda. Manbalarga ko‘ra, temuriy shahzodalar ham chavandozlik, harbiy san’at bo‘yicha maxsus o‘qitilgan. Xususan, Bobur bir vaqtning o‘zida bir necha otlar ustida yugurib, ya’ni otdan-otga sakrab o‘z chavandozlik mahoratini ko‘rsata olgan. 

Vatan himoyasida sobit turgan mard o‘g‘lonlarning “Eng ilg‘or otliq guruh” ko‘rik-tanlovidagi ishtiroki, ularning chaqqonligi va ruhiy quvvati, abjirligi, intilishi va shiddati milliy armiyamiz qo‘shinlarida ulug‘ ajdodlar an’analari davom etayotganidan dalolatdir.

Ko‘rik tanlovning yakuniy natijalariga ko‘ra, 1-o‘rin Toshkent harbiy okrugiga, 2-o‘rin Janubi-g‘arbiy maxsus harbiy okrug va Sharqiy harbiy okrug jamoalariga, 3-o‘rin esa Markaziy harbiy okrug va Shimoliy-g‘arbiy harbiy okrug chavondozlariga nasib etdi. G‘olib jamoalar kubok, diplom, qimmatbaho sovg‘a bilan taqdirlandi.

Mudofaa vazirligi Axborot va ommaviy kommunikatsiyalar departamenti