Harbiy psixologlarning navbatdagi guruhi klinik psixologiya o‘quv kursini tugatdi
2024-11-07 16:05:00 / Yangiliklar
Unda harbiy qism va ularga tenglashtirilgan batalyonlarda faoliyat olib borayotgan psixologlar yetakchi oliy ta’lim muassasalarining tajribali professor-o‘qituvchilaridan klinik psixologiya yo‘nalishida muhim bilimlarni egalladi.
Tadbirda qo‘shinlar jangovar tayyorgarligi va shayligini oshirishga ijobiy ta’sir ko‘rsatayotgan psixologlar xizmati alohida e’tirof etildi. Darhaqiqat, zamonaviy jang sharoitida shaxsiy tarkibni faol jangovar harakatlarga psixologik tayyorlaydigan chuqur nazariy bilim, katta tajriba va mahoratga ega bo‘lgan kadrlarni yetishtirish bugungi kunning dolzarb masalalaridan biridir.
Bundan tashqari, o‘quv kursida olingan bilimlar xizmat jarayonida shaxsiy tarkib orasidagi muammolarni hal etish, ularga dalda va quvvat berish, eng muhimi kundalik va jangovar sharoitlardagi ruhiy bardoshni, harbiy xizmatchilarning axloqiy-ruhiy sifatlarini oshirishda muhim o‘rin tutadi.
O‘quv kursi rahbarlari, shuningdek, professor-o‘qituvchilar ma’ruzalaridan so‘ng bitiruvchilarga sertifikatlar tantanali topshirildi.
Mudofaa vazirligi Axborot va ommaviy kommunikatsiyalar departamenti