Markaziy harbiy okrugda “Keksalar turizmi oyligi” start oldi
2024-11-02 17:35:00 / Yangiliklar
Bugun, 2-noyabr kuni Samarqand garnizonida ushbu oylik doirasida tashkil etiladigan tadbirlarga tanatanali ravishda start berildi. Unda okrug qo‘mondonligi, Qurolli Kuchlar safida ko‘p yillar davomida samarali xizmat qilgan faxriylar, viloyatdagi nuroniylar, jamoatchilik kengashi vakillari hamda yoshlar ishtrok etishdi.
Tadbir “Nuroniylar — yoshlarga ibrat!” shiori ostidagi avlodlar uchrashuvi bilan boshlandi. Uchrashuvda mudofaa sohasida faoliyat yuritgan katta va o‘rta avlod vakillari hamda nuroniylar o‘z hayotiy tajribalari, bosib o‘tgan ibratli umr yo‘llari haqida qiziqarli va jonli tarzda hikoya qilishdi.
Shuningdek, keksalar mamlakatimizda yoshlarga yaratib berilayotgan imkoniyatlar xususidagi mulohazalarini bildirib, milliy armiyamizning tinchlik-osoyishtalikni ta’minlashdagi roli va yoshlarni vatanparvarlik ruhida tarbiyalashdagi muhim ahamiyati haqida suhbatlashdi.
Tadbir davomida tashkil etilgan konsert dasturlari, kitob yarmarkalari hamda Kichik mutaxassislar tayyorlash markazi bo‘ylab qilingan ekskursiya ishtirokchilarga unitilmas onlarni taqdim etdi.
Kunning ikkinchi qismida tadbir ishtirokchilari ko‘hna va navqiron Samarqand shahrning qadimiy serjilo me’morchilik obidalari bilan tanishib, o‘rta asrlar davrida moviy gumbazli muazzam minoralar va o‘lmas obidalarga ega mazkur shaharning naqadar rivoj topganini yaqindan guvoh bo‘lishdi.
Markaziy harbiyt okrug matbuot xizmati