O‘zbekiston Respublikasi Mudofaa vazirligi

Ko‘rik-tanlov avvalida Mudofaa vazirligi tibbiy ta’minot boshqarmasi boshlig‘i so‘zga chiqdi. Uning so‘zlariga ko‘ra, o‘tgan yillar davomida davlatimiz rahbari tashabbuslari bilan vazirlik harbiy gospitallari va tibbiyot muassasalari infratuzilmasini yanada rivojlantirish bo‘yicha keng ko‘lamli tadbirlar rejasi amalga oshirilgan. Unga muvofiq, eski binolar o‘rniga yangilari qurilgan, davolash-diagnostika bo‘limlari jahon standartlariga javob beradigan to‘liq tibbiy asbob-uskunalar bilan ta’minlangan. Bu esa murojaat qilayotgan bemorlarning to‘liq davolanishlariga asos bo‘lmoqda.

Boshqarma boshlig‘i, shuningdek, mutaxassislarning malaka va bilimi borasidagi yangilanishlar haqida gapirar ekan, harbiy xizmatchilar va ular oila a’zolariga sifatli xizmat ko‘rsatishda kichik va o‘rta tibbiyot xodimlarining alohida o‘rni borligini e’tirof etdi. Ular bajarayotgan vazifa, egallagan bilim va tajribasi harbiy gospitallar faoliyatini belgilaydigan muhim mezon, dedi jumladan.

Besh shart bo‘yicha o‘zaro bellashuvda harbiy gospitallarning eng ilg‘or hamshiralari chiqishlari, ixtisoslik bo‘yicha bilim va amaliy tajribalarini Mudofaa vazirligi mas’ullari, ko‘p yillik tajribaga ega shifokorlar, Mudofaa vazirligi ma’naviyat va madaniyat departamenti, O‘zbekiston Yoshlar ittifoqi Surxondaryo viloyat Kengashi vakillaridan iborat hakamlar baholadilar.

Joriy yilda o‘tkazilgan ko‘rik-tanlov o‘tgan yillardagidan farq qilib, unda mutaxasislik bo‘yicha savol va sinovlarga katta o‘rin berilgani jarayonda yaqqol ko‘zga tashlandi. Ishtirokchilar o‘zlari va faoliyat yuritayotgan muassasa haqida “Salomlashuv va tanishtiruv” deb nomlangan birinchi shartda erkin chiqish qildilar. Ikkinchi shartda ular turli ko‘rinish va holatlarda jarohat olgan bemorlarni qabul qilish, holatni baholash, tashxis qo‘yish, dori-darmon, tibbiy asbob-uskunalar yordamida muolaja qilish shartini ham nazariy, ham amaliy bajardilar.

Uchinchi shart ham o‘ziga xos bo‘lib, klinik imtihon tarzida o‘tkazildi. Unda hamshiralar shoshilinch tez tibbiy yordam, dizinfeksiya, sterilizatsiya, terapeya, jarrohlik kabi yo‘nalishlarda nazariy bilimlari, ya’ni odam anatomiyasi va fiziologiyasi, kasalliklar etiologiyasi, klinik belgisi, hamshira tashxisi va profilaktik chora-tadbirlar bo‘yicha, amaliy bilimlari – hamshiralik ishi faoliyatidagi ko‘nikmalarni amalda ko‘rsatib berishi, tibbiy asbob uskunalar bilan tanishligi va ulardan foydalanish darajasi bo‘yicha sinovdan o‘tkazildi. To‘rtinchi va beshinchi shartlar ijtimoiy-siyosiy va tibbiy bilimlar bo‘yicha tezkor savol-javobdan iborat bo‘ldi.

Tomoshabinlarning olqishlari va ruhiy qo‘llab-quvvatlovi bilan bir necha soat davom etgan bellashuv Mudofaa vazirligi tizimida kichik va o‘rta tibbiyot xodimlarining bugungi darajasi, bilim va ko‘nikmasi qay darajada ekanligini ko‘rsatdi.

Yakuniy natijalarga ko‘ra, birinchi o‘rinni Mudofaa vazirligi Markaziy harbiy klinik gospitali hamshirasi Mohibonu Hamidova egalladi. Ikkinchi o‘ringa Termiz harbiy gospitali hamshirasi Zarina Nodirova, uchinchi o‘ringa Farg‘ona harbiy gospitali hamshirasi Shohista Haydarova loyiq topildi.

G‘olib va sovrindorlar tashkilotchilar tomonidan munosib taqdirlandi. Birinchi o‘rin sohibasiga esa kelgusi yil may oyida respublika miqyosida o‘tkaziladigan “Eng ilg‘or hamshira” ko‘rik-tanlovida ishtirok etish yo‘llanmasi berildi.

Mudofaa vazirligi Axborot va ommaviy kommunikatsiyalar departamenti