O‘zbekiston Respublikasi Mudofaa vazirligi

Harbiy gospital va okrug tasarrufidagi harbiy qismlar hamda viloyatdagi barcha kuch tuzilmalari tibbiyot xizmati mutaxassislarini karantin va o‘ta xavfli infeksiyalar qayd etilganda yoki shubha qilinganda o‘tkaziladigan epidemiyaga qarshi profilaktik chora-tadbirlar bo‘yicha bilim va ko‘nikmalarini oshirishga qaratilgan tadbir jarayonlari 9 ta o‘quv nuqtasida olib borildi. 

Jumladan, shartli ravishda o’ta xavfli kasallikka chalingan yoki shunga gumon qilingan bemor shikoyat bilan kelganda tibbiyot xizmati xodimlarining bajarishi lozim bo‘lgan dastlabki harakatlar ketma-ketligi, yuritiladigan hujjatlar borasida to‘laligicha ma’lumotlar berildi. Shu bilan birga, qat’iy tartibga o‘tkazish jarayonida gospital ish faoliyatini qayta tashkil etish, shifokorlar maxsus himoya kiyimida bemordan namuna olish, ko‘rikdan o‘tkazish, dastlabki taxminiy tashxisni qo‘yish ishlariga jalb etilishi lozimligi ko‘rgazmali tarzda amaliy ko‘rib chiqildi.

Boshqa o‘quv nuqtalarida esa qat’iy tartib hududini chegaralash hamda kirib chiqish nazoratini kuchaytirish, sanitar o‘tkazgich, karantinga olingan obyektning moddiy texnik ta’minoti masalasida olib boriladigan chora-tadbirlar, shuningdek, dezinfeksiya, dezinseksiya, deratizatsiya kabi zararsizlantirish tadbirlarini o‘tkazish borasidagi amaliy ko‘nikmalar mustahkamlandi.

O‘quv yakunida erishilgan yutuqlar va yo‘l qo‘yilgan kamchiliklar sarhisob qilinib, tibbiyot mutaxassislarining tajribasini oshirishga qaratilgan bu kabi yig‘inlarning takror o‘tkazilishi masalalari kelishib olindi. 

Janubi-g‘arbiy maxsus harbiy okrug matbuot xizmati