Chirchiqda yoshlarning bo‘sh vaqtlarini mazmunli o‘tkazishga qaratilgan keng qamrovli tadbirlar bo‘lib o‘tdi
2024-10-26 17:20:00 / Yangiliklar
Unda Toshkent harbiy okrugi qoʻmondonligi, Oʻzbekiston yoshlar ittifoqi Toshkent viloyati Kengashi faollari, viloyat "Vatan tayanchi" bolalar va o‘smirlar harbiy-vatanparvarlik harakati boʻlimi vakillari, Yoshlar ishlari agentligi viloyat boshqarmasi mutasaddilari, oliy ta’lim muassasalari talabalari va o‘quvchi yoshlar ishtirok etdi.
Tadbirda yoshlarni vatanparvarlik ruhida tarbiyalash, ularda Vatan taqdiri uchun daxldorlik tuygʻularini shakllantirish, asosiysi, boʻsh vaqtini mazmunli tashkil etish maqsad qilib olindi. Xususan, ishtirokchilar harbiy qismda yaratilgan sharoitlarni ko‘zdan kechirib, harbiy xizmatchilar bilan bevosita muloqotga kirishdi. Ayniqsa, qurol-aslaha va harbiy texnikalar koʻrgazmasi, faxriy qorovul hamda qoʻl jangi namoyishi, harbiy orkestr jamoasining Vatanni madh etuvchi koʻrgazmali chiqishlari yoshlarda katta qiziqish uygʻotdi.
Kun davomida esa Toshkent harbiy okrugi qo‘shinlari qo‘mondoni ishtirokida “Qo‘mondon va yoshlar” uchrashuvi o‘tkazildi. Muloqot davomida yigit-qizlarning taklif va muammolari tinglandi, ular tomonidan berilgan savollarga atroflicha javoblar qaytarildi. O‘tkazilgan tadbirlarda faollik ko‘rsatgan bir guruh yoshlarga esdalik sovg‘alari topshirildi.
Toshkent harbiy okrugi matbuot xizmati