O‘zbekiston Respublikasi Mudofaa vazirligi

Maʼlumki, ona tili – millatning ruhi, milliy oʻzligi, mustaqillik belgisi hamda bebaho boyligidir.

Ayniqsa, yosh avlodni Vatanga muhabbat, milliy qadriyatlarimizga hurmat
va yuksak vatanparvarlik ruhida tarbiyalashda ona tilimizning oʻrni beqiyosdir.

Shu bois, Davlatimiz rahbarining tashabbusi bilan soʻnggi yillarda oʻzbek tilini rivojlantirish va uning jamiyatdagi nufuzini oshirishga qaratilgan keng koʻlamli islohotlar amalga oshirildi.

Xususan, bundan yetti yil avval, yaʼni 2019-yil 21-oktabr kuni Hurmatli Prezidentimizning “Oʻzbek tilining davlat tili sifatidagi nufuzi va mavqeini tubdan oshirish chora-tadbirlari toʻgʻrisida”gi Farmoni qabul qilinib, 21-oktabr sanasi “Oʻzbek tili bayrami kuni” deb belgilandi.

2020-yil 20-oktabr kuni Davlatimiz rahbarining PF-6084-son Farmoni bilan 2020-2030-yillarda oʻzbek tilini rivojlantirish va til siyosatini takomillashtirish konsepsiyasi tasdiqlandi.

Albatta, bu muhim hujjatlarning imzolanishi jonajon Vatanimiz
va xalqimizning ijtimoiy-siyosiy, madaniy hamda maʼnaviy hayotida unutilmas tarixiy voqea boʻldi.

Shu bilan birga, yosh avlodga oʻzbek tilini puxta oʻrgatish, zamonaviy darsliklar va elektron resurslar yaratish hamda ona tilimizni rivojlantirish yoʻlida sunʼiy intellekt imkoniyatlaridan foydalanishga alohida eʼtibor qaratilmoqda.

Davlat tili toʻgʻrisidagi Qonunga asosan qabul qilingan konsepsiya
va dasturlar natijasida taʼlim, ilm-fan, tibbiyot, huquq, mudofaa, umuman barcha sohalarda ona tilimizning mavqei tobora yuksalib bormoqda.

Bu borada, birgina Mudofaa vazirligi tizimida keng koʻlamli ishlar amalga oshirilib, barcha turdagi ish yuritish va boshqa hujjatlarni lotin yozuviga asoslangan oʻzbek alifbosida ishlab chiqish, qabul qilish hamda eʼlon qilish amaliyoti joriy etildi.

Shuningdek, rahbarlik lavozimlarga tayinlanadigan harbiy xizmatchilarning davlat tilini bilish darajasini aniqlash maqsadida nomzodlar test sinovlariga jalb etilmoqda.

Harbiy xizmatchilar va Qurolli Kuchlar xizmatchilari uchun Alisher Navoiy nomidagi Toshkent davlat oʻzbek tili va adabiyoti universiteti huzuridagi Davlat tilida ish yuritish asoslarini oʻqitish va malaka oshirish markazi hamda uning hududiy boʻlinmalarida malaka oshirish kurslari tashkil etilmoqda.

Mazkur kurslarda ular lotin yozuviga asoslangan oʻzbek alifbosi, imlo qoidalari hamda davlat tilida ish yuritish asoslarini oʻrganib, egallagan bilim va koʻnikmalarini amaliy faoliyatida keng qoʻllamoqdalar.

Qadrli doʻstlar va hurmatli hamkasblar!

Ona tilimizni asrab-avaylash, uning mavqeini koʻtarish har birimizning faol fuqarolik burchimiz ekanligini aslo unutmasligimiz kerak.

Zero, ona tilimizga boʻlgan hurmat – jonajon Vatanimizga boʻlgan hurmatimizning yorqin ifodasidir!

Bu borada xalqimizning buyuk maʼrifatparvar allomasi Abdulla Avloniy
“Har bir millatning dunyoda borligini koʻrsatadurgʻon oynai hayoti til va adabiyotdur. Milliy tilni yoʻqotmak millatning ruhini yoʻqotmakdur” – deb bejiz aytmagan.

Shu bois, har birimiz davlat tilimizni bilishimiz va buni burch hamda majburiyat sifatida his etishimiz lozim.

Fursatdan foydalanib, ona tilimizning mavqeini yanada yuksaltirish,
uni ardoqlash va rivojlantirish yoʻlida oʻz hissasini qoʻshib kelayotgan barchaga samimiy minnatdorchilik bildiraman.

Ushbu qutlugʻ va tarixiy sana bilan Sizlarni yana bir bor tabriklab, sharafli
va masʼuliyatli xizmatlaringizda ulkan muvaffaqiyatlar tilayman!

Yurtimiz tinch, xalqimiz farovon, milliy qadriyatlarimiz abadiy boʻlsin!

Oʻzbekiston Respublikasi mudofaa vaziri

general - mayor Kudratxodjayev Botir Baxromovich