O‘zbekiston Respublikasi Mudofaa vazirligi

Jarayon nazariy bilimlarni mustahkamlash va amaliy ko‘nikmalarni shakllantirishga yo‘naltirilgan.

O‘quv jarayoni belgilangan jadval asosida tashkil etilgan bo‘lib, unda chaqiriluvchilar kunni ertalabki saflanish bilan boshlaydi, so‘ngra tanlagan yo‘nalishlari bo‘yicha nazariy va amaliy darslarga qatnashadi. Kasbiy bilimlarni puxta o‘zlashtirish mashg‘ulotlarning asosiy maqsadi sanaladi.

Mustaqil ta’lim olish uchun markazda alohida kutubxona faoliyat yuritmoqda. Yoshlar undagi adabiyotlar yordamida dars jarayonida olgan bilimlarini chuqurlashtirib, bo‘sh vaqtlarini ham foydali o‘tkazmoqda.

Jismoniy tayyorgarlik uchun markazda zamonaviy trenajyor zali jihozlangan. Bu yerda chaqiriluvchilar muntazam shug‘ullanib, chiniqish va chidamlilikni oshirmoqda. Dam olish hamda keyingi mashg‘ulotlarga tayyorlanish uchun ikki kishilik yotoqxonalar ham mavjud.

Amaliy darslar sifatini oshirishda yangi texnika muhim o‘rin tutmoqda: yaqinda O‘zbekiston Respublikasi Mudofaa vazirligi markazga mamlakatimizda ishlab chiqarilgan yangi avtomobillarni topshirdi. Nazariy imtihonlarni muvaffaqiyatli topshirgan yoshlar ushbu avtomobillarda haydash bo‘yicha amaliy mashg‘ulotlarga jalb etilib, tajriba va ko‘nikmalarini mustahkamlamoqda.

Markazda chavandozlik guruhi ham tashkil etilgan. Mashg‘ulotlarda yoshlarning ot sportiga qiziqishini oshirish, otni boshqarish malakasini rivojlantirish hamda jismoniy chaqqonlikni shakllantirishga e’tibor qaratilmoqda.

Nazariy va amaliy darslar, jismoniy tayyorgarlik hamda mustaqil ta’limni o‘zida jamlagan bunday yondashuv chaqiriluvchilarning harbiy-texnik mutaxassisliklarni mukammal egallashiga zamin yaratmoqda. Natijada ular kelgusida malakali mutaxassis bo‘lib yetishadi.