Oʻzbekiston Respublikasi mudofaa vaziri “ADEX 2026” 6-Ozarbayjon xalqaro mudofaa koʻrgazmasida ishtirok etdi
2026-09-30 16:00:00 / Yangiliklar
Delegatsiyamiz vakillari dastlab Boku shahrida oʻtkazilayotgan “ADEX 2026” 6-Ozarbayjon xalqaro mudofaa koʻrgazmasining ochilish marosimida ishtirok etishdi.
Quvonarlisi, mintaqada mudofaa sanoati sohasidagi eng nufuzli va foydali platformalardan biri deya eʼtirof etilayotgan ushbu koʻrgazmada Oʻzbekiston Respublikasi Mudofaa sanoati vakillari “Made in Uzbekistan” yagona milliy brendi ostida mamlakatimiz mudofaa sanoatining ishlab chiqarish va texnologik salohiyatini namoyish etmoqda.
Koʻrgazma doirasida Oʻzbekiston Respublikasi mudofaa vaziri general-leytenant Shuxrat Xalmuxamedov Ozarbayjon Respublikasi Prezidenti Ilhom Aliyev bilan uchrashdi.
Uchrashuv chogʻida mudofaa vaziri Ozarboyjon Respublikasi Prezidentiga milliy stenddan oʻrin olgan, mahalliy korxonalarda ishlab chiqarilgan zamonaviy mudofaa mahsulotlari, oʻq-dorilar, shaxsiy himoya vositalari, harbiy anjomlar, aviatsiya vositalari, shuningdek, dron va antiron tizimlarini tanishtirdi.
Ikki tomonlama muzokaralar davomida "ADEX" va "Securex Caspian" koʻrgazmalari ishtirokchilar oʻrtasida yangi ishbilarmonlik aloqalarini oʻrnatishga, shuningdek, harbiy-texnik hamkorlikni mustahkamlashga salmoqli hissa qoʻshishiga ishonch bildirildi.