O‘zbekiston Respublikasi Mudofaa vazirligi

Milliy armiyamizda yuqori kasbiy va jismoniy malakaga ega harbiy xizmatchilarni tayyorlash, qoʻshinlarning yuksak jangovar shayligini saqlash maqsadida davlatimiz rahbari tomonidan 2021-yil 10-dekabrda “Oʻzbekiston Respublikasi Qurolli Kuchlari harbiy xizmatchilarining jismoniy tayyorgarligini yuqori darajada tashkil etish boʻyicha qoʻshimcha chora-tadbirlar toʻgʻrisida”gi qarori qabul qilingan. Qarorga ilova qilingan tegishli nizomda esa harbiy xizmatchilarni intensiv sinovlardan o‘tkazish va ularni “Dovyurak jangchi” farqlovchi nishoni bilan taqdirlash tartibi belgilangan.

Ana shu maqsadda Markaziy harbiy okrug “Forish” togʻ poligonida “Dovyurak jangchi” farqlovchi nishoni uchun navbatdagi intensiv sinovlar boshlandi. Yigʻinning tantanali ochilish marosimida Mudofaa vazirligi, Markaziy harbiy okrug mas’ullari, harbiy xizmatchilarning ishtirokini baholab boradigan yo‘riqchi-mutaxassislar hamda farqlovchi nishonni olish uchun kelgan da’vogarlar ishtirok etdi.

Marosimda soʻz olganlar mazkur sinovlar milliy armiyamizda yuqori kasbiy va jismoniy malakaga ega harbiy xizmatchilarni tayyorlash, qoʻshinlarning jangovar shayligini yuksaltirish yoʻlida olib borilayotgan ishlarning yana bir amaliy ifodasi ekanini taʼkidlar ekan, harbiy xizmatchilarga mustahkam iroda va kuch-g‘ayrat, yengilmas matonat hamda omad yor bo‘lishini tiladi.

Ma’lumot uchun, oʻn kun davomida harbiy xizmatchilar turli mashqlardan iborat uch bosqichli sinovlardan o‘tadi. Birinchi bosqich kuch mashqlarini bajarishdan iborat boʻlsa, ikkinchi bosqich 30 kilometrga piyoda yurish (marsh yugurish) va uchinchi bosqich yagona toʻsiqlar yoʻlagidan umumiy nazorat mashqlarini bajargan holda o‘tish, oʻqotar qurollardan o‘q otish hamda pichoq uloqtirish amaliyotidan iborat.

Ayni paytda dastlabki guruhlar shartlarni bajarishga kirishgan. Barcha sinovlardan muvaffaqiyatli o‘tgan harbiy xizmatchilarga beriladigan “Dovyurak jangchi” farqlovchi nishoni butun xizmat faoliyati davomida saqlanib qoladi.

Mudofaa vazirligi Axborot va ommaviy kommunikatsiyalar departamenti