Forishda “To‘maris izdoshlari” ko‘rik-tanlovining yakuniy bosqichi bo‘lib o‘tmoqda
2026-09-16 17:15:00 / Yangiliklar
Markaziy harbiy okrug “Forish” dala-o‘quv maydonida Mudofaa vazirligi qo‘shinlarida xizmat qilayotgan harbiy xizmatchi ayollar o‘rtasida “To‘maris izdoshlari” ko‘rik-tanlovining uchinchi — yakuniy bosqichiga start berildi. Unda Mudofaa vazirligi tasarrufidagi harbiy okrug va qo‘mondonliklar, muassasa va birlashmalarda faoliyat olib borayotgan xotin-qizlar ishtirok etmoqda.
Qizg‘in va murosasiz kechayotgan bahslar davomida ishtirokchi qizlar o‘zlarining jismoniy tayyorgarligi, aqliy salohiyati, chaqqonligi va tezkorligini turli sinovlarda namoyon etmoqda. Har bir shart ulardan nafaqat yuqori tayyorgarlik va mahoratni, balki qat’iyat, topqirlik, jamoaviy hamjihatlik hamda o‘ziga bo‘lgan ishonchni ham talab qilmoqda.
Bellashuvlar davomida ishtirokchilarning har bir harakati, qarori va natijasi hakamlar hay’ati tomonidan belgilangan mezonlar asosida baholanib, ular o‘rtasidagi sog‘lom raqobat tobora kuchayib bormoqda.
Eslatib o'tamiz, tanlov g‘oliblari diplom, pul mukofoti va esdalik sovg‘alar bilan taqdirlanadi. Shuningdek, bir qator nominatsiyalar bo‘yicha ham harbiy xizmatchilar rag‘batlantirilishi ko'zda tutilgan.
Markaziy harbiy okrug matbuot xizmati