Harbiy xizmatchilar oʻrtasida korrupsiyaga qarshi madaniyatni yuksaltirishga qaratilgan profilaktik tadbir oʻtkazildi
2026-09-04 19:45:00 / Yangiliklar
Unda Mudofaa vazirligi Korrupsiyaga qarshi ichki nazorat boʻlimi mutaxassislari ishtirok etib, harbiy xizmatchilar bilan korrupsiyaga qarshi kurashish, xizmat intizomiga qat’iy rioya etish hamda huquqiy madaniyatni yuksaltirish masalalari yuzasidan tushuntirish ishlari olib bordi.
Tadbir davomida korrupsiyaning kelib chiqishiga sabab boʻluvchi omillar, uning jamiyat va davlat taraqqiyotiga, shuningdek, harbiy jamoalardagi sogʻlom maʻnaviy-ruhiy muhit hamda xizmat intizomiga salbiy taʻsiri haqida batafsil maʻlumot berildi. Korrupsiyaning har qanday koʻrinishi qonuniylik va adolat tamoyillariga zid ekani, bunday holatlarga yoʻl qoʻymaslik har bir harbiy xizmatchining muhim vazifasi ekani alohida taʻkidlandi.
Shuningdek, korrupsion huquqbuzarliklar sodir etilgan taqdirda qoʻllaniladigan javobgarlik choralari, ularning huquqiy oqibatlari hamda xizmat faoliyatida qonun talablariga rioya etishning ahamiyati tushuntirildi. Harbiy xizmatchilarga halollik, vijdonlilik, masʻuliyat va xizmat burchiga sadoqat kabi fazilatlar korrupsiyaga qarshi kurashishning muhim omillari ekani qayd etildi.
Profilaktik tadbirda har bir harbiy xizmatchining xizmat vazifalarini vijdonan bajarishi, qonun va harbiy intizom talablariga qatʻiy amal qilishi, manfaatlar toʻqnashuvi hamda korrupsiyaga oid holatlarga nisbatan murosasiz munosabatda boʻlishi zarurligiga alohida aytib o‘tildi.