O‘zbekiston Respublikasi Mudofaa vazirligi

Unda Pokistonda akkreditatsiyadan o‘tgan diplomatik korpus vakillari, jumladan, Turkmaniston, Ozarbayjon, Qozog‘iston, Kuba va Rossiya diplomatlari, O‘zbekistonda istiqomat qilayotgan yurtdoshlarimiz, shuningdek, mahalliy ommaviy axborot vositalari vakillari ishtirok etdi.
Tadbirda so‘zga chiqqan Pokiston vakillari O‘zbekiston xalqini Mustaqillikning 35 yilligi bilan samimiy muborakbod etib, xalqimizning boy madaniy merosi, milliy qadriyatlari, mehmondo‘stligi va Vatanga bo‘lgan yuksak muhabbatini alohida e’tirof etishdi.
Bayram dasturining eng yorqin lahzalaridan biri O‘zbekiston Respublikasi Qurolli Kuchlarining Markaziy ashula va raqs ansambli ijodkorlarining chiqishlari bo‘ldi. San’atkorlar tomonidan Vatanni ulug‘lovchi, yurtga muhabbat va sadoqat tuyg‘ularini tarannum etuvchi kuy-qo‘shiqlar, shuningdek, xalqimizning boy milliy an’analari va qadriyatlarini aks ettiruvchi o‘zbek milliy raqslari ijro etildi.
Ansamblning chiqishlari orqali o‘zbek xalqining o‘ziga xos milliy madaniyati, urf-odatlari va an’analari keng namoyish etildi. Jarangdor kuy-qo‘shiqlar va jo‘shqin raqslar nafaqat Pokistonda istiqomat qilayotgan yurtdoshlarimiz, balki tadbirga tashrif buyurgan pokistonlik tomoshabinlarga ham ko‘tarinki kayfiyat va unutilmas taassurot ulashdi.
Tadbir dasturidan Pokiston xalqining milliy kuy-qo‘shiqlari ham o‘rin oldi. Bu ikki qardosh xalqning o‘zaro hurmati, do‘stligi va mushtarak madaniy qadriyatlarini yana bir bor namoyon etdi.
Tomoshabinlar o‘zbek san’atkorlarining chiqishlarini katta qiziqish bilan kutib oldilar va milliy kuy-qo‘shiqlar sadolari ostida raqslarga qo‘shildilar. Samimiy va do‘stona ruhda o‘tgan ushbu bayram tadbiri O‘zbekiston va Pokiston xalqlari o‘rtasidagi tarixiy do‘stlik va birodarlik rishtalarini yanada mustahkamlashga xizmat qildi.