O‘zbekiston Respublikasi Mudofaa vazirligi

Uchrashuv davomida tomonlar zamonaviy texnologiyalarni mudofaa sohasiga joriy etish, ilmiy-tadqiqot va innovatsion loyihalarni amalga oshirish hamda yuqori malakali mutaxassislar tayyorlash masalalarini muhokama qildilar.
Shuningdek, sun’iy intellekt, Machine Learning, Deep Learning, Computer Vision va Natural Language Processing kabi ilg‘or texnologiyalar bo‘yicha qo‘shma loyihalarni amalga oshirish yuzasidan fikr almashildi.
Muzokaralar yakunida Mudofaa vazirligi nomidan vazirning raqamlashtirish, sun’iy intellekt va kiberxavfsizlik bo‘yicha o‘rinbosari polkovnik Baxrom Urmanov hamda Toshkent Kimyo xalqaro universiteti rektori, professor Akmal Allakulliyev tomonidan hamkorlik memorandumi imzolandi.
Hamkorlik doirasida axborot tizimlarini himoya qilish, kibertahdidlarni aniqlash va tahlil qilish, axborot xavfsizligi auditini tashkil etish hamda kiberhimoya vositalarini takomillashtirish bo‘yicha qo‘shma ishlar amalga oshiriladi.
Shuningdek, harbiy xizmatchilar va Mudofaa vazirligi xodimlari uchun zamonaviy texnologiyalar bo‘yicha o‘quv kurslari, malaka oshirish va qayta tayyorlash dasturlarini tashkil etish, talabalar uchun esa amaliyot va stajirovka imkoniyatlarini yaratish ko‘zda tutilgan.
Tomonlar qo‘shma ilmiy-tadqiqot loyihalari, startaplar va innovatsion ishlanmalarni qo‘llab-quvvatlash, ilmiy-amaliy konferensiya, seminar va treninglarni birgalikda tashkil etish bo‘yicha ham kelishib oldilar.
Mazkur memorandum mudofaa sohasida raqamli transformatsiyani jadallashtirish, innovatsion texnologiyalarni amaliyotga joriy etish va zamonaviy bilimlarga ega mutaxassislar tayyorlashga xizmat qiladi.
Mudofaa vazirligi Axborot va ommaviy kommunikatsiyalar departamenti