O‘zbekiston Respublikasi Mudofaa vazirligi

Tantanali tadbirda Toshkent harbiy okrugi qoʻshinlari qo‘mondoni, Sirdaryo viloyati hokimi, jamoatchilik faollari, harbiy xizmatchilar, chaqiriluvchilar va ularning ota-onalari hamda ommaviy axborot vositalari xodimlari ishtirok etdi.

Soʻzga chiqqanlar ushbu markaz sirdaryolik yoshlar uchun katta imkoniyatlar debochasi vazifasini oʻtashini taʼkidladi. Shuningdek, mamlakatimizda harbiy sohada olib borilayotgan tizimli ishlar xususida toʻxtalib oʻtildi. Toshkent harbiy okrugi qoʻshinlari qoʻmondoni Sirdaryo viloyati hokimi, viloyat harbiy-maʼmuriy sektor rahbariga samarali hamkorlik uchun oʻz minnatdorligini bildirdi.

Shundan soʻng ramziy tasmalar kesilib, yangidan barpo etilgan zamonaviy bino – yotoqxona, oshxona, maishiy xizmat koʻrsatish obyektlari chaqiriluvchilarning ota-onalari, nuroniylar hamrohligida koʻzdan kechirildi.

Aytish joizki, mazkur markaz Oʻzbekiston Respublikasi Prezidentining 2018-yil 12-dekabrdagi “Yoshlarni vatanparvarlik ruhida va jismoniy tarbiyalash hamda chaqiriluvchilarni harbiy-texnik mutaxassisliklar boʻyicha tayyorlash tartibini takomillashtirish boʻyicha qoʻshimcha chora-tadbirlar toʻgʻrisida”gi qarori asosida tashkil topgan. Bu yerda chaqiriluvchilar 3 yoʻnalish – “B, C” toifali haydovchilik, “Radiotelefonist” va “Chavandoz” mutaxassisliklari boʻyicha tahsil oladi. Markaz oʻquv yili davomida uch bosqichda chaqiriluvchilarni tayyorlab, Qurolli Kuchlar tizimiga yoʻnaltiradi.

Mudofaa vazirligi Axborot va ommaviy kommunikatsiyalar departamenti