O‘zbekiston Respublikasi Mudofaa vazirligi

Joriy yilgi test sinovlarida mamlakatimiz tarixida ilk bor muddatli harbiy xizmatni o‘tayotgan yoshlar ham belgilangan tartibda oliy ta’lim muassasalariga kirish test sinovlarida ishtirok etmoqda.

Mazkur yangilik davlatimiz tomonidan yoshlarning ta’lim olishi, ularning intellektual salohiyatini yuksaltirish hamda harbiy xizmatni o‘tash bilan bir qatorda kelajakdagi kasbiy rivojlanishi uchun keng imkoniyatlar yaratishga qaratilgan islohotlarning amaliy ifodasidir. Joriy yildan boshlab muddatli harbiy xizmatchilar xizmatni o‘tash davrining o‘zidayoq oliy ta’lim muassasalariga kirish test sinovlarida qatnashish huquqiga ega bo‘ldi. Bu esa harbiy xizmat va ta’lim jarayonini uzviy uyg‘unlashtirish, yoshlarning bilim olishga bo‘lgan intilishini qo‘llab-quvvatlash hamda ularning kelajakdagi ta’lim faoliyatini uzluksiz davom ettirishga xizmat qilmoqda.

Shu munosabat bilan bugun Namangan, Termiz va Nukus garnizonlaridagi harbiy qismlarda muddatli harbiy xizmatchilarning test sinovlarida munosib ishtirok etishi uchun barcha zarur tashkiliy va amaliy chora-tadbirlar amalga oshirildi. Harbiy xizmatchilar belgilangan tartib asosida test sinovlari o‘tkaziladigan hududlarga kuzatilib, ularning xavfsiz va o‘z vaqtida sinovlarda ishtirok etishi ta’minlandi.

Test jarayonlarida ishtirok etayotgan muddatli harbiy xizmatchilar uchun zarur shart-sharoitlar yaratilib, barcha tashkiliy masalalar amaldagi tartib va talablar asosida yo‘lga qo‘yildi.

Yaratilgan imkoniyatga muvofiq, muddatli harbiy xizmatchilar oliy ta’lim muassasasiga talabalikka tavsiya etilgan taqdirda, harbiy xizmatni o‘tash davrida birinchi o‘quv choragini masofaviy ta’lim shaklida o‘zlashtiradi. Muddatli harbiy xizmatni muvaffaqiyatli yakunlagach esa o‘qishga qabul qilingan oliy ta’lim muassasasida ikkinchi o‘quv choragidan boshlab kunduzgi ta’lim jarayonini davom ettiradi.

Mudofaa vazirligi Axborot va ommaviy kommunikatsiyalar departamenti