O‘zbekiston Respublikasi Mudofaa vazirligi

“Mudofaa vaziri kubogi” uchun kechgan bahslarda vazirlik qoʻshinlarining harbiy okruglari, birlashma, oliy harbiy taʼlim muassasalari hamda markazga boʻysunuvchi harbiy qismlardan iborat 13 ta jamoaning 100 nafarga yaqin aʼzosi 7 vazn toifasida, yaʼni -60, -66, -73,- 81, -90, -100 kg va +100 kg vazn toifalarida gʻoliblik uchun bahslashdi.

Shuningdek, 2024-yil – Yoshlar va biznesni qoʻllab-quvvatlash yili munosabati bilan Mudofaa vazirligi tashabbusi bilan 60 nafardan ziyod xorazmlik yoshlar oʻrtasida -46, -50, -55,- 60, -66, -77 kg va +77 kg vazn toifalarida sport bellashuvi tashkil etildi.

Musobaqaning tantanali ochilish marosimida Shimoli-gʻarbiy harbiy okrug qoʻshinlari qoʻmondonligi, Mudofaa vazirligi ofitserlari, Xorazm viloyati hokimligi rahbariyati, Respublika kurash federatsiyasi vakillari, taniqli sportchilar, yoshlar hamda harbiy xizmatchilar ishtirok etdi.

Murosasiz bahslarga boy oʻtgan chempionat katta sportga kirib kelayotgan yosh va umidli sportchilar, ham ilgari yuksak natijalarga erishib kelayotgan pahlavonlarga oʻzaro tajriba almashish, oʻz kuchi va imkoniyatlarini yana bir bor sinovdan oʻtkazish hamda koʻnikmalarini mustahkamlashga imkon yaratdi.

Bellashuvning yakuniy natijalariga koʻra, umumjamoa hisobida chempionatning mutlaq gʻolibligi Toifalangan obyektlarni qoʻriqlash qoʻshinlari qoʻmondonligi jamoasiga nasib etdi. Shohsupaning ikkinchi pogʻonasidan Janubi-gʻarbiy maxsus harbiy okrug sportchilari oʻrin oldi. Toʻplagan umumiy ballari hisobi boʻyicha tenglashgan Shimoli-gʻarbiy harbiy okrug va JG‘MHO vakillari musobaqa jadvalining uchinchi pogʻonasidan joy olishdi.

Chempionatda gʻolib boʻlgan jamoa Oʻzbekiston Respublikasi Mudofaa vazirligining kubogi, faxrli oʻrinlarni egallagan qolgan jamoalar tegishli darajadagi diplom, medallar hamda qimmatbaho sovgʻalar bilan taqdirlandi.

Shuningdek, musobaqani tashkil etish va oʻtkazishda Mudofaa vazirligiga yaqindan koʻmak bergan bir qator tashkilot vakillariga vazirlik nomidan tashakkurnomalar berildi.

Shimoli-gʻarbiy harbiy okrug matbuot xizmati