Mudofaa vazirligi va Huquqni muhofaza qilish akademiyasi o‘rtasidagi hamkorlik yangi bosqichga ko‘tarildi
2026-07-03 15:20:00 / Yangiliklar
Mazkur hujjat zamonaviy tahdid va xavf-xatarlar sharoitida raqamli kriminalistika, kiberxavfsizlik, sud-ekspertiza faoliyati hamda mutaxassislar malakasini oshirish yo‘nalishlarida tizimli hamkorlikni yo‘lga qo‘yish va uni yanada rivojlantirishga qaratilgan.
Memorandum doirasida tomonlarning ilmiy-amaliy salohiyatini o‘zaro uyg‘unlashtirish, ilg‘or tajriba almashish hamda sohaga oid zamonaviy yondashuvlarni amaliyotga tatbiq etish bo‘yicha qator istiqbolli yo‘nalishlarda hamkorlikni amalga oshirish belgilandi. Jumladan, raqamli dalillarni aniqlash, yig‘ish, qayd etish, saqlash va tahlil qilish bo‘yicha mutaxassislarning bilim va amaliy ko‘nikmalarini takomillashtirish, qo‘shma o‘quv mashg‘ulotlari, seminarlar, amaliy treninglar, ilmiy-amaliy konferensiyalar hamda tadqiqot loyihalarini tashkil etish rejalashtirilgan.
Shuningdek, axborot xavfsizligini ta’minlash, kiberjinoyatlarga qarshi kurashish, sud-ekspertiza faoliyatiga ilg‘or texnologiyalarni joriy etish hamda ushbu yo‘nalishlarda malakali kadrlarni tayyorlash va ularning kasbiy salohiyatini muntazam oshirib borish yuzasidan hamkorlikni izchil rivojlantirish nazarda tutilgan.
Tadbir doirasida Mudofaa vazirligi delegatsiyasi Huquqni muhofaza qilish akademiyasining asosiy faoliyat yo‘nalishlari, ta’lim jarayoni, ilmiy-tadqiqot ishlari, zamonaviy o‘quv va ilmiy laboratoriyalari hamda amaliy tayyorgarlik infratuzilmasi bilan yaqindan tanishdi. Mehmonlarga raqamli kriminalistika va sud-ekspertiza yo‘nalishlarida qo‘llanilayotgan zamonaviy texnologiyalar, innovatsion o‘quv metodikalari hamda ilmiy ishlanmalar yuzasidan batafsil ma’lumot taqdim etildi.
Uchrashuv yakunida Memorandum ikki tashkilot o‘rtasidagi o‘zaro manfaatli hamkorlikni yangi bosqichga olib chiqishi, ilmiy va amaliy tajriba almashinuvini kengaytirishi, zamonaviy kiberxavflarning oldini olish hamda ushbu sohalar uchun yuqori malakali mutaxassislarni tayyorlash tizimini yanada takomillashtirishga xizmat qilishi ta’kidlandi.
Mudofaa vazirligi Axborot va ommaviy kommunikatsiyalar departamenti