O‘zbekiston Respublikasi Mudofaa vazirligi

“Bir boʻlsak – yagona xalqmiz, birlashsak – Vatanmiz!” shiori ostida Qoraqalpogʻiston Respublikasi boʻylab keng oʻtkazilayotgan harbiy xizmatchilar tomonidan saxovat va koʻmak tadbirlari, uchrashuv va konsert dasturlari xalq va armiya yakdilligini ifodalab, yurtdoshlarimizga xushkayfiyat ulashmoqda.

Olis manzillardagi ijtimoiy-iqtisodiy rivojlanishi sust boʻlgan qishloq va ovul ahliga amaliy yordam koʻrsatish, ular holidan xabar olish, moddiy va maʼnaviy koʻmak berish maqsadida Shimoli-gʻarbiy harbiy okrug qoʻshinlari qoʻmondonligi tashabbusi bilan Chimboy tumanidagi “Qos terek” hamda Qoraoʻzak tumanidagi “Qoʻyboq” mahalla fuqarolar yigʻinlarida boʻlib oʻtdi. Harbiy xizmatchilar tomonidan tashkil etilgan “Mehr-saxovat” aksiyasi jami 200 ga yaqin oilaga moddiy va maʼnaviy koʻmaklar berildi.

Ana shunday xayriya aksiyalari doirasida mahallalarda “Armiya va yoshlar” uchrashuvlari, festival va konsert dasturlari oʻtkazilib, vatanparvarlikni tarannum etuvchi kuy-qoʻshiqlar, shodon navolar ovul ahli va yoshlarga bir olam shodlik ulashdi.

“Qos terek” hamda “Qoʻyboq” ovul ahliga salomatlik ulashish maqsadida kelgan Nukus harbiy gospitali mutaxassislari tomonidan aholi va bolalar uchun begʻaraz tibbiy koʻriklar oʻtkazilib, tezkor laboratoriya tashxisi, ultratovushli apparat tekshiruvi hamda boshqa shifokorlarning sayyor qabuli tashkil etildi. Koʻchma mobil harbiy tibbiy markaz hamda harbiy gospitaldagi soʻnggi rusumdagi zamonaviy tibbiy tekshiruv uskunalari imkoniyatlaridan unumli foydalanilgan holda harbiy shifokorlar yuzlab vatandoshlarimizga tibbiy maslahat, muolaja va tibbiy xizmat koʻrsata olishdi.

Odamiylik, mehr-oqibat, insonparvarlik, bagʻrikenglik kabi ezgu amallar xalqimizda azal-azaldan ulugʻlanib kelinadi. Insonparvarlik fazilatlari bizda qadriyat darajasiga koʻtarilib, ajdodlardan meros sifatida qadrlanadi.

Harbiy xizmatchilardan iborat saxovat guruhi tomonidan ijtimoiy himoyaga birinchi navbatda muhtoj boʻlgan vatandoshlarimiz uylariga borilib, ular holidan xabar olindi, moddiy va maʼnaviy yordam berildi.

Shimoli-gʻarbiy harbiy okrug matbuot xizmati