O‘zbekiston Respublikasi Mudofaa vazirligi

Mashg‘ulot davomida ofitserlarning nazariy bilimlarini oshirishga alohida e’tibor qaratildi. Xususan, xaritada ishlash, mavjud vaziyatni chuqur tahlil qilish, axloqiy-ruhiy ta’minotni rejalashtirish, xizmat faoliyatiga oid hujjatlarni belgilangan tartibda yuritish masalalari atroflicha ko‘rib chiqildi. Bu esa ishtirokchilarning harbiy boshqaruv jarayonlarida to‘g‘ri qaror qabul qilish, vaziyatni tezkor baholash hamda xizmatni samarali tashkil etish borasidagi amaliy salohiyatini yanada oshirishga xizmat qildi.

Shuningdek, mashg‘ulot jarayonida jangovar harakatlar va turli harbiy mashg‘ulotlar vaqtida shaxsiy tarkibning ma’naviy-ruhiy holatini mustahkam saqlash, harbiy xizmatchilarda Vatanga sadoqat, yuksak mas’uliyat, fidoyilik va burchga sodiqlik tuyg‘ularini kuchaytirish masalalariga alohida urg‘u berildi. Ishtirokchilarga harbiy jamoalarda sog‘lom ma’naviy muhitni shakllantirish, shaxsiy tarkibni belgilangan vazifalarni sidqidildan va muvaffaqiyatli bajarishga ruhlantirish, har qanday murakkab vaziyatda ularning ruhiy barqarorligini ta’minlash yuzasidan zarur nazariy va uslubiy tavsiyalar berildi.

Mashg‘ulot doirasida harbiy xizmatchilarning axloqiy-ruhiy ta’minotini tashkil etish tartibi batafsil muhokama qilinib, bu borada ofitserlarning xizmat faoliyatida duch kelishi mumkin bo‘lgan turli vaziyatlar yuzasidan yondashuvlari tahlil qilindi. Ayniqsa, ularning tezkor va asosli qaror qabul qilish, vaziyatga mos ravishda to‘g‘ri harakat qilish, bo‘linmalarda ma’naviy-ruhiy barqarorlikni ta’minlashga qaratilgan chora-tadbirlarni puxta rejalashtirish borasidagi ko‘nikmalari sinovdan o‘tkazildi.

Tadbir yakunida ishtirokchilarning mazkur yo‘nalishdagi bilim va malakalarini yanada mustahkamlash, xizmat faoliyatini zamonaviy yondashuvlar asosida samarali tashkil etish, jangovar harakatlar va o‘quv mashg‘ulotlari davomida axloqiy-ruhiy ta’minotni yanada takomillashtirish yuzasidan tegishli tavsiyalar berildi.

Sharqiy harbiy okrug matbuot xizmati