O‘zbekiston Respublikasi Mudofaa vazirligi

“O‘zbekiston – 2030” strategiyasi doirasida Mudofaa vazirligining qo‘mondonlik tarkibidagi ofitserlari Akademiyaning “Zamonaviy boshqaruv mahorati” kursida malaka oshirdi.
Ta’kidlash joizki, bugungi kunga qadar mazkur kurslarda 700 nafardan ortiq rahbar lavozimdagi ofitserlar o‘z malakasini oshirgan. Joriy yilning iyun oyida ham bir guruh istiqbolli ofitserlar o‘quv dasturini muvaffaqiyatli yakunlab, bitiruv tadbirida ishtirok etdi.
O‘quv mashg‘ulotlari davomida tajribali professor-o‘qituvchilar tomonidan zamonaviy geosiyosiy tendensiyalar, xalqaro xavfsizlik masalalari, “O‘zbekiston – 2030” strategiyasi, strategik boshqaruv va qaror qabul qilish, rahbar xodimlarga qo‘yilayotgan zamonaviy talablar, boshqaruvda raqamli va sun’iy intellekt texnologiyalaridan foydalanish hamda davlat xizmatida halollik standartlari mavzularida trening va seminarlar o‘tkazildi.
Bitiruvchilar o‘z chiqishlarida egallagan yangi bilim va ko‘nikmalari kelgusida qo‘shinlarni samarali boshqarishda, rahbarlik faoliyatini yanada takomillashtirish hamda Vatanimiz xavfsizligini ta’minlashdagi xizmat samaradorligini oshirishida muhim dasturil amal bo‘lib xizmat qilishini ta‘kidlab o‘tishdi.
Tadbir yakunida O‘zbekiston Respublikasi Prezidenti huzuridagi Davlat siyosati va boshqaruvi akademiyasi rahbariyati hamda Mudofaa vazirligi mas’ul vakillari tomonidan tinglovchilarga sertifikatlar topshirildi.
Mudofaa vazirligi Axborot va ommaviy kommunikatsiyalar departamenti