Harbiy xizmatchilar hissasi bilan bunyod etilgan tibbiyot maskani foydalanishga topshirildi
2026-06-21 10:00:00 / Yangiliklar
Mazkur zamonaviy tibbiyot maskanining bunyod etilishida Mudofaa vazirligi hamda Jizzax garnizonidagi harbiy xizmatchilar munosib hissa qo‘shdi. Ularning fidokorona mehnati natijasida hudud aholisi uchun barcha qulayliklarga ega tibbiy xizmat maskani barpo etildi.
Tadbirda davlat va jamoat tashkilotlari vakillari, mahalla faollari, nuroniylar, shuningdek, Markaziy harbiy okrug vakillari va harbiy xizmatchilar ishtirok etdi.
1958-yilda qurilgan eski bino o‘rnida qad rostlagan yangi filial zamonaviy tibbiy jihozlar bilan ta’minlangan bo‘lib, unda kunduzgi statsionar, laboratoriya, EKG, ona va bola salomatligi, emlash hamda boshqa tibbiy xizmat xonalari tashkil etilgan.
Mazkur bunyodkorlik ishlari harbiy xizmatchilarning yurt mudofaasi bilan bir qatorda xalq farovonligi va hududlarni rivojlantirish yo‘lidagi ezgu tashabbuslarda ham faol ishtirok etayotganining yana bir amaliy ifodasidir.
Markaziy harbiy okrug matbuot xizmati