O‘zbekiston Respublikasi Mudofaa vazirligi

Yosh avlodning jismoniy va ma’naviy kamolotini ta’minlash, ularning bo‘sh vaqtini samarali tashkil etish hamda vatanparvarlik ruhida tarbiyalash maqsadida oromgohda 12 kun davomida keng qamrovli tadbirlar amalga oshirildi. Xususan, xorijiy tillarni o‘rganish, sport musobaqalari, intellektual bellashuvlar, ijodiy to‘garaklar, amaliy mashg‘ulotlar va ma’naviy-ma’rifiy uchrashuvlar muntazam ravishda tashkil etildi.
Mashg‘ulotlar tajribali pedagoglar, murabbiylar hamda mutaxassislar tomonidan olib borilib, bolalarning qiziqishlari va iste’dodlarini yuzaga chiqarishga alohida e’tibor qaratildi. Natijada ishtirokchilar nafaqat maroqli dam oldilar, balki o‘zlarining bilim va salohiyatlarini yanada rivojlantirish imkoniyatiga ega bo‘ldi.
Oromgoh faoliyatining muhim jihatlaridan biri sifatida dual ta’lim tizimi asosida samarali ishlar yo‘lga qo‘yildi. Ushbu tizim orqali oliy ta’lim muassasalarida tahsil olayotgan iqtidorli talabalar amaliy tajriba orttirib, bolalar bilan ishlash ko‘nikmalarini mustahkamladi.
Mavsumning yopilish marosimi ko‘tarinki ruh va bayramona kayfiyatda o‘tkazildi. Tadbirda Maxsus avariya-tiklash boshqarmasining “Impuls” jamoasi ishtirok etib, o‘zining dilbar kuy-qo‘shiqlari bilan yig‘ilganlarga unutilmas lahzalarni tuhfa etdi.
Tantanali marosim davomida bolajonlar oromgohdagi 12 kunlik faoliyatlari davomida egallagan bilim va ko‘nikmalarini namoyish etdi. Ular tomonidan tayyorlangan milliy va jahon estradasi qo‘shiqlari asosidagi raqs kompozitsiyalari, sahna ko‘rinishlari hamda ko‘rgazmali chiqishlar tomoshabinlarda katta taassurot qoldirdi. Ayniqsa, farzandlarining erishgan yutuqlari va sahnadagi erkin chiqishlarini kuzatgan ota-onalar o‘z minnatdorliklarini bildirib, oromgoh jamoasining fidokorona mehnatini yuksak baholadi.
Ta’kidlash joizki, “Tong” bolalar sog‘lomlashtirish oromgohi yosh avlodning har tomonlama barkamol bo‘lib voyaga yetishi, ularning sog‘lom turmush tarziga amal qilishi, Vatanga sadoqat va milliy qadriyatlarga hurmat ruhida tarbiyalanishiga xizmat qiluvchi muhim maskanlardan biri hisoblanadi.
Kelgusida ham oromgohda yanada qiziqarli va mazmunli dasturlar asosida yangi mavsumlar tashkil etilishi rejalashtirilgan bo‘lib, bolalarning sog‘lom hordiq chiqarishi, iste’dod va qobiliyatlarini rivojlantirishi hamda vatanparvarlik tuyg‘ularini mustahkamlashga qaratilgan tadbirlar izchil davom ettiriladi.
Mudofaa vazirligi Axborot va ommaviy kommunikatsiyalar departamenti