O‘zbekiston Respublikasi Mudofaa vazirligi

Musobaqaning ochilish marosimida soʻzga chiqqanlar mamlakatimizda yoshlarni sportga keng jalb etish, ularning boʻsh vaqtlarini mazmunli tashkil etish, jismoniy va maʼnaviy salohiyatini oshirish borasida amalga oshirilayotgan ishlar xususida toʻxtalib oʻtdilar. Shuningdek, musobaqaning maqsad va vazifalari hamda shartlari ishtirokchilarga yana bir bor tushuntirildi.
Shundan soʻng musobaqaga rasman start berildi.
18–22 yoshli oʻgʻil-qizlar 6 ta shart boʻyicha bellashdilar. Jumladan, turnikda tortilish va orqa bilan yotgan holatdan tanani koʻtarish, oʻquv qoʻl granatasini uzoqlikka uloqtirish, uzoq va yaqin masofalarga yugurish, AK-74 avtomati qurolini notoʻliq qismlarga ajratish va yigʻish hamda pnevmatik quroldan oʻq uzish kabi sinovlarda ishtirok etdilar.
Qiziqarli va murosasiz kechgan bahslar davomida yoshlar oʻzlarining harbiy tayyorgarligi, jismoniy imkoniyatlari, chaqqonligi va aniqligini namoyon etdilar. Musobaqa kuch, tezlik, matonat va harbiy koʻnikmalarni sinovdan oʻtkazgan haqiqiy bellashuvga aylandi. Yakuniy natijalarga koʻra, Termiz shahrining “Eski shahar” mahallasi jamoasi uchinchi, Bandixon tumanining “Zevar” mahallasi jamoasi ikkinchi oʻrinni egalladi.
Sariosiyo tumanining “Nurbuloq” mahallasi yoshlari esa barcha shartlar boʻyicha eng yuqori natijani qayd etib, mutlaq gʻolib sifatida keyingi bosqich yoʻllanmasini qoʻlga kiritdi.
Gʻolib va sovrindorlar diplom hamda esdalik sovgʻalari bilan taqdirlandilar.
Taʼkidlash joizki, “Shijoat va gʻayrat” musobaqasining respublika final bosqichida yuqori natijalarga erishgan ishtirokchilarga harbiy va harbiylashtirilgan oliy taʼlim muassasalariga oʻqishga kirish uchun tavsiyanomalar beriladi. Shuningdek, finalda birinchi oʻrinni egallagan jamoa mahallasiga namunaviy universal sport maydonchasi, ikkinchi oʻrin sohibi mahallasiga stret-vorkout maydonchasi, uchinchi oʻrin sohibiga esa vorkout maydonchasi qurib berilishi belgilangan.
Bu kabi musobaqalar yoshlarning jismoniy tayyorgarligini mustahkamlash, harbiy-vatanparvarlik ruhini yuksaltirish hamda ularning kelgusida milliy armiyamiz safida munosib xizmat qilishi uchun mustahkam zamin yaratmoqda.
III darajali serjant Akbar AXMEDOV,
Termiz garnizoni.