“Shijoat va g‘ayrat” harbiy-sport musobaqasining Toshkent shahar bosqichi bo‘lib o‘tdi
2026-06-06 16:00:00 / Yangiliklar
18 yoshdan 22 yoshgacha bo‘lgan yoshlar ishtirok etgan musobaqa jismoniy tayyorgarlik, chaqqonlik, matonat hamda harbiy-amaliy ko‘nikmalarni sinovdan o‘tkazishga xizmat qildi.
Bellashuvlar davomida ishtirokchilar turnikda tortilish, press mashqlari, o‘quv granatasini uzoqlikka uloqtirish, qisqa va uzoq masofalarga yugurish, shuningdek AK-74 avtomatini qismlarga ajratish va qayta yig‘ish kabi shartlar bo‘yicha o‘z mahoratlarini namoyish etdilar.
Musobaqaning asosiy maqsadi yoshlar orasida vatanparvarlik tuyg‘ularini mustahkamlash, sog‘lom turmush tarzini targ‘ib qilish, jismoniy salohiyatni oshirish hamda harbiy xizmatga bo‘lgan qiziqishni kuchaytirishdan iborat bo‘ldi.
Murosasiz va qiziqarli bahslar ostida o‘tgan musobaqa yakunlariga ko‘ra:
1-o‘rin — Mirzo Ulug‘bek tumani jamoasi
2-o‘rin — Yashnobod tumani jamoasi
3-o‘rin — Shayxontohur tumani jamoasi
Taqdirlash marosimida g‘olib va faol ishtirok etgan jamoalarga diplom, medal hamda esdalik sovg‘alari topshirildi.
Toshkent harbiy okrugi matbuot xizmati