O‘zbekiston Respublikasi Mudofaa vazirligi

Kuni kecha final bosqichi ishtirokchilari Qarshi temiryo‘l vokzalida tantanali ravishda kutib olindi. Marosimda harbiy okrug, Harbiy aviatsiya instituti vakillari, yoshlar tashkilotlari faollari hamda jamoatchilik vakillari ishtirok etib, yoshlarga samimiy tilaklarini bildirdi.
Bugun Qarshi shahridagi Harbiy aviatsiya institutida musobaqaning tantanali ochilish marosimi bo‘lib o‘tdi. Unda Mudofaa vazirligi, Maktabgacha va maktab ta’limi vazirligi hamda Janubi-g‘arbiy maxsus harbiy okrug vakillari ishtirok etib, finalchilarni qutladi va ularga omad tilashdi.
Musobaqaning saralash bosqichlarida respublika bo‘ylab faoliyat yuritayotgan 208 ta “Jasorat maktabi” o‘quvchilari qatnashdi. Yakunda eng yuqori natijalarni qayd etgan 14 ta jamoa respublika final bosqichi yo‘llanmasini qo‘lga kiritdi.
Final bahslari davomida ishtirokchilar harbiy-amaliy tayyorgarlik, sport va intellektual yo‘nalishlarda o‘z bilim va ko‘nikmalarini sinovdan o‘tkazadi. Shuningdek, musobaqa doirasida ma’naviy-ma’rifiy hamda madaniy tadbirlar tashkil etilib, yoshlarning dunyoqarashini kengaytirish, vatanparvarlik tuyg‘ularini mustahkamlash va hududlararo do‘stona aloqalarni rivojlantirishga alohida e’tibor qaratiladi.
“Jasorat uchqunlari” musobaqasi yosh avlodni Vatanga sadoqat ruhida tarbiyalash, ularda liderlik fazilatlari, jamoada ishlash ko‘nikmalari va jismoniy tayyorgarlikni rivojlantirishga xizmat qiluvchi muhim loyihalardan biri hisoblanadi.
Janubi-g‘arbiy maxsus harbiy okrug matbuot xizmati