O‘zbekiston Respublikasi Mudofaa vazirligi

Musobaqa Turkiyaning Isparta shahridagi “Kommandos” tog‘-o‘quv mashqlar markazida tashkil etildi. Unda O‘zbekiston, Turkiya, Turkmaniston, Pokiston, Shimoliy Kipr Turk Respublikasi, Kosovo, Ozarbayjon, Italiya, Gruziya, Bolgariya, Mongoliya, Ispaniya hamda Jazoir davlatlari jamoalari o‘zaro kuch sinashdi.
Ishtirokchilar guruhlarga bo‘lingan holda murakkabligi yuqori bo‘lgan 8 ta shart bo‘yicha bahslarda qatnashdi. Jumladan, harbiy jamoalar “Minora va qayiqdan o‘q otish”, “Jangovar otish”, “Yuqori aniqlikda otish”, “To‘siq ortidan otish”, “Havodagi vertolyotdan otish”, “O‘zini sinash”, “Tunda noma’lum masofalarga o‘q otish” hamda “Syurpriz” shartlari bo‘yicha mahoratini namoyish etdi.
Musobaqa davomida jamoalarning 7 ta shart asosida to‘plagan ballari sarhisob qilinib, eng kuchli o‘nta jamoa final bosqichiga yo‘llanma oldi. Quvonarlisi, hal qiluvchi bahsda o‘zbekistonlik mohir merganlar vazifalarni yuqori aniqlik va tezkorlik bilan bajarib, rekord natijalarni qayd etdi. Murakkab vazifalarni muddatidan oldin ado etgan harbiylarimiz o‘zlarining yuksak professional tayyorgarlikka ega ekanini amalda namoyon qildi.
Qariyb 10 kun davom etgan bellashuvlar yakuniga ko‘ra, O‘zbekiston Respublikasi Mudofaa vazirligi harbiy xizmatchilaridan iborat jamoa xorijiy davlatlar armiyalari orasida faxrli 1-o‘rinni egallab, oltin medal bilan taqdirlandi.
Ta’kidlash joizki, O‘zbekiston Respublikasi Mudofaa vazirligi jamoasi ushbu musobaqada beshinchi marotaba ishtirok etmoqda. 2022–2023-yillarda 2-o‘rinni, 2024–2026-yillarda esa ketma-ket 1-o‘rinni qo‘lga kiritib kelmoqda.
Bunday nufuzli xalqaro musobaqalarda qatnashish harbiy xizmatchilarimizning jangovar tayyorgarligini yanada oshirish, ilg‘or tajribalarni o‘rganish va o‘zaro bilim almashishda muhim ahamiyat kasb etadi.
Mudofaa vazirligi Axborot va ommaviy kommunikatsiyalar departamenti