O‘zbekiston Respublikasi Mudofaa vazirligi

Tadbir davomida 2025/2026-o‘quv yili mobaynida amalga oshirilgan samarali ishlar, qo‘lga kiritilgan yutuqlar va ijobiy natijalar atroflicha muhokama qilindi. Xususan, harbiy xizmatni tashkil etish, chaqiruv jarayonlarini tizimli yo‘lga qo‘yish, yoshlarni vatanparvarlik ruhida tarbiyalash hamda harbiy boshqaruv organlari faoliyatini raqamlashtirish borasida olib borilgan ishlar alohida e’tirof etildi.

Shu bilan birga, yig‘in tanqidiy-tahliliy ruhda o‘tkazilib, tizim faoliyatida uchrayotgan ayrim kamchilik va muammolar ham ochiq muhokama qilindi. Ularni bartaraf etish, xizmat intizomini yanada mustahkamlash, har bir rahbarning shaxsiy mas’uliyatini oshirish yuzasidan aniq vazifalar belgilab olindi. Ta’kidlanganidek, bugungi murakkab va mas’uliyatli davr har bir harbiy xizmatchidan yuqori hushyorlik, fidoyilik hamda xizmat burchiga sadoqat bilan yondashishni talab etadi.

Yig‘inda muddatli harbiy xizmatga chaqiriluvchilarni saralash va butlash jarayonlarini raqamlashtirish masalasiga alohida e’tibor qaratildi. Zamonaviy axborot-kommunikatsiya texnologiyalarining keng joriy etilishi inson omilini qisqartirish, shaffoflikni ta’minlash hamda adolat mezonlarini mustahkamlashda muhim omil bo‘layotgani qayd etildi.

Shuningdek, Mudofaa vazirligi Korrupsiyaga qarshi kurashish bo‘limi ma'sullari tomonidan korrupsiyaga qarshi kurashish, jinoyatchilik va turli salbiy holatlarning oldini olish borasida amalga oshirilayotgan ishlar yuzasidan ham batafsil tahlillar o‘tkazildi. Harbiy boshqaruv organlarida qonun ustuvorligini ta’minlash, xizmat intizomiga qat’iy rioya etish hamda sog‘lom ma’naviy muhitni shakllantirish bugungi kunning eng muhim vazifalaridan biri ekani alohida ta’kidlandi.

Tadbirning amaliy qismida boshqarma va bo‘lim boshliqlarining bilim va ko‘nikmalarini sinovdan o‘tkazishga qaratilgan mashg‘ulotlar tashkil etildi. Unda rahbar kadrlarning strategik fikrlashi, tezkor va to‘g‘ri qaror qabul qilish qobiliyati, boshqaruv salohiyati hamda zamonaviy yondashuvlar asosida faoliyat yuritish mahorati baholandi.

Shimoli-g‘arbiy harbiy okrug matbuot xizmati