O‘zbekiston o‘q otish sporti federatsiyasining navbatdagi yig‘ilishi bo‘lib o‘tdi
2026-05-15 20:50:00 / Yangiliklar
Unda mudofaa vaziri, general-leytenant Shuxrat Xalmuxamedov — O‘zbekiston o‘q otish sporti federatsiyasi raisi, Sport vazirining o‘rinbosari, O‘zbekiston Milliy olimpiya qo‘mitasi vakillari, shuningdek, respublikamizning barcha hududlarida tashkil etilgan studiyalar orqali harbiy okrug harbiy xizmatchilari, “Vatanparvar” tashkiloti vakillari, sportchilar, federatsiya mutasaddilari hamda murabbiylar ishtirok etdi.
Tadbir davomida o‘q otish sport turi so‘nggi yillarda sezilarli rivojlanayotgani, bu esa sportchilarimizning Osiyo va jahon chempionatlarida qo‘lga kiritayotgan yutuqlarida yaqqol namoyon bo‘layotgani alohida ta’kidlandi.
Yig‘ilish kun tartibiga muvofiq, federatsiya tomonidan hududlarda amalga oshirilayotgan ishlar, mazkur sport turini keng targ‘ib qilish, iqtidorli sportchilarni saralash hamda ularni xalqaro musobaqalarga munosib tayyorlash borasidagi faoliyat tahlil qilindi.
Shuningdek, kelgusida amalga oshirilishi lozim bo‘lgan ustuvor vazifalar belgilab olindi. Xususan, joriy yilda o‘tkaziladigan Osiyo o‘yinlarida munosib ishtirok etish, shuningdek, Olimpiya o‘yinlari uchun zarur litsenziyalarni qo‘lga kiritish masalalariga alohida e’tibor qaratildi. Sportchilarga yuqori natijalarga erishishlari uchun barcha zarur sharoitlarni yaratish muhim ekani qayd etildi.
Tadbir yakunida o‘q otish sporti bo‘yicha yuqori natijalarni qayd etgan sportchilar hamda ularning murabbiylari munosib rag‘batlantirildi.
Mudofaa vazirligi Axborot va ommaviy kommunikatsiyalar departamenti