O‘zbekiston Respublikasi Mudofaa vazirligi

Maʻlumki, joriy yilning 20-yanvar kuni “Mahallalarda yoshlar bilan ishlash masalalarini muvofiqlashtirish boʻyicha Respublika komissiyasi”ning navbatdagi yigʻilishi oʻtkazilib, unda yoshlarni jamiyatda oʻz oʻrnini topishiga koʻmaklashish, ularni kasb-hunarga va xorijiy tillarga oʻqitish, bandligini taʻminlash hamda mazmunli hordiq chiqarishlari uchun zarur sharoitlar yaratish masalalariga alohida eʻtibor qaratilgan edi.

Respublika komissiyasining tegishli qaroriga muvofiq, joriy yilda jinoyatchilikka moyil “ogʻir” toifadagi 7 921 nafar yoshlar Oʻzbekiston Respublikasi Mudofaa vazirligiga biriktirildi.

Mazkur toifadagi yoshlar bilan manzilli va tizimli ishlarni tashkil etish maqsadida Mudofaa vazirining qaroriga asosan har haftaning payshanba kuni “Vazirlikka biriktirilgan yoshlar bilan ishlash kuni” etib belgilangan. Hozirgi kunda yoshlar bilan profilaktik suhbatlar, maʻnaviy-maʻrifiy uchrashuvlar, sport va madaniy tadbirlar muntazam ravishda tashkil etib kelinmoqda.

Navbatdagi tadbir doirasida Mudofaa vazirligi Markaziy apparati, Toshkent harbiy okrugi hamda Toifalangan obyektlarni qoʻriqlash qoʻshinlari qoʻmondonligi masʻul ofitserlariga biriktirilgan yoshlar uchun “Ona qalbi” spektakli namoyish etildi.

Mazkur spektakl orqali yoshlarga milliy qadriyatlar, oilaviy mehr-oqibat, ona siymosining ulugʻligi hamda insoniy fazilatlarning ahamiyati badiiy talqin orqali yetkazildi.

Bunday madaniy-maʻrifiy tadbirlar yoshlarning dunyoqarashini kengaytirish, ularni yot gʻoyalardan asrash, Vatanga sadoqat va daxldorlik tuygʻularini mustahkamlashda muhim ahamiyat kasb etmoqda.