O‘zbekiston Respublikasi Mudofaa vazirligi

Bugungi kunda Mudofaa vazirligida harbiy xizmatchilarning jangovar shayligi, kasbiy mahorati hamda tezkor harakat qilish qobiliyatini yanada yuksaltirishga alohida eʻtibor qaratilmoqda. Jumladan, Mudofaa vazirligiga qarashli qoʻmondonlik tasarrufidagi dala oʻquv maydonida navbatdagi amaliy mashgʻulotlar tashkil etildi.
 Kutilmagan vaziyatlar fonida oʻtayotgan mashqlar azamatlarning nafaqat jismoniy, balki ruhiy tayyorgarligini ham sinovdan oʻtkazishiga xizmat qilmoqda. Mashgʻulotlar real jangga yaqin sharoitlarda olib borilmoqda. Qarorlarning esa toʻgʻri qabul qilinayotgani ularning jamoaviy jipslikda olib borayotgan harakatlaridan ham maʻlum.

Ushbu jarayonlar davomida shaxsiy tarkib shartli dushman bilan kurashish, himoya va hujum harakatlarini olib borish, jangovar safda harakatlanish, yashirinish va joy tanlash, zamonaviy qurol-yarogʻ va texnik vositalardan samarali foydalanish boʻyicha koʻnikmalarini mustahkamlab bordi. Alohida eʻtibor esa kutilmagan vaziyatlarda tez va toʻgʻri qaror qabul qilish hamda jamoaviy hamkorlikni kuchaytirishga qaratildi.

Mashgʻulotlarning asosiy qismi yaqin masofadagi jang sharoitlarida harakatlanishga qaratildi. Maxsus oʻquv binosida tashkil etilgan mashgʻulotda harbiy xizmatchilar real jang sharoitiga yaqin vaziyatda bino ichida jangovar quroldan foydalanib, tor va cheklangan hududlarda samarali oʻt ochish, nishonlarni aniqlash va zararsizlantirish, xonalarni tozalash, eshiklardan kirib borish va burchaklarni nazoratga olish kabi amaliy koʻnikmalarni mashq qildilar.

Murakkab manyovrlar bilan binoga kirib borish va chiqish, vaziyatni tez baholash va moslashish, qurolni samarali qoʻllash asosiy talablardan biri bo‘ldi. Bu kabi vazifalar harbiy xizmatchilarning taktik ustunligini oshirishi bilan birga ularda yuqori darajadagi jangovar tayyorgarlik, masʻuliyat va vazifani aniq bajarish malakasini ham mustahkamlaydi.

Oʻq otish mashgʻulotlari harbiy tayyorgarlikning muhim tarkibiy qismi hisoblanadi. Chunki jang maydonida har bir qaror, har bir bosilgan tugma va har bir oʻqning oʻz vazifasi bor. Navbatdagi jarayonlarda harbiy xizmatchilar kichik guruhlarga boʻlingan holda oʻzaro muvofiqlikda harakat qilishdi. Maydon boʻylab turli xil masofalarda joylashgan nishonlarga qarata snayper, avtomat va pulemyot kabi qurollardan foydalangan holda aniq zarbalar berildi.

Bu yerda har bir qadam aniqlikni, har bir harakat esa puxta hisob-kitobni talab etdi. Eng muhimi tezkorlik bilan birga aniqlikni yoʻqotmaslik. Mashgʻulotlarda ham, amaliy harakatlarda ham aynan shu jihatga eʻtibor qaratildi. Jamoaviy uygʻunlik, oʻzaro ishonch va doimiy tayyorgarlik – muvaffaqiyatning asosiy omilidir.

Har bir mashgʻulot yakunida erishilgan natijalar chuqur tahlil qilindi. Bu tahlillar keyingi mashgʻulotlarda ustuvor yoʻnalishlarni belgilashga, harbiylarning jismoniy va ruhiy tayyorgarligini yanada mustahkamlashga yordam beradi. Erishilgan natijalar esa shuni koʻrsatadiki, izchil tayyorgarlik va amaliy mashgʻulotlar harbiy xizmat samaradorligini oshirishda muhim ahamiyat kasb etadi.

Mudofaa vazirligi Axborot va ommaviy kommunikatsiyalar departamenti