Andijonda zamonaviy turar-joy hamda kasbga oʻqitish binosi foydalanishga topshirildi
2026-05-09 14:00:00 / Yangiliklar
Tantanali ochilish marosimlarida viloyat hokimligi, Sharqiy harbiy okrug qoʻmondonligi, davlat va jamoat tashkilotlari, huquqni muhofaza qiluvchi idoralar rahbarlari hamda jamoatchilik vakillari ishtirok etdilar.
Xususan, bugungi kunda yangi uy-joylar, zamonaviy koʻp qavatli binolar, ijtimoiy va infratuzilma obyektlari qad rostlayotgan Yangi Bobur shahrida harbiy xizmatchilarga xonadonlar kalitlarini topshirish marosimi boʻlib oʻtdi.
Tadbir davomida soʻzga chiqqanlar yurt tinchligi va xavfsizligini taʻminlash yoʻlida fidoyilik bilan xizmat qilayotgan harbiy xizmatchilar hamda ularning oila aʻzolariga yaratilayotgan shart-sharoitlar davlat siyosatining ustuvor yoʻnalishlaridan biri ekanini alohida taʻkidladilar.
Davlatimiz rahbari tashabbusi asosida harbiy xizmatchilar va ularning oila aʻzolarini ijtimoiy qoʻllab-quvvatlash, ular uchun munosib yashash sharoitlarini yaratish borasidagi ishlar izchil davom ettirilmoqda. Bugun foydalanishga topshirilgan 50 ta xonadondan iborat zamonaviy turar-joy majmuasi ana shu gʻamxoʻrlikning yana bir amaliy ifodasidir. Sakkiz qavatli ushbu binoda ikki va uch xonali barcha qulayliklarga ega shinam xonadonlar barpo etilgan.
Shuningdek, Andijon garnizonidagi harbiy qismda muddatli harbiy xizmatchilarni kasbga oʻqitishga moʻljallangan yangi bino ham foydalanishga topshirildi. Mazkur maskanda yosh askarlarga turli kasb-hunar yoʻnalishlari boʻyicha bilim va koʻnikmalar berish uchun zamonaviy sharoitlar yaratilgan.
Sharqiy harbiy okrug matbuot xizmati