O‘zbekiston Respublikasi Mudofaa vazirligi

Ayniqsa, Qurolli Kuchlar tizimida harbiy boshqaruvni raqamlashtirish, xavfsiz kommunikatsiya tarmoqlarini yaratish hamda qo‘shinlarni zamonaviy aloqa vositalari bilan ta’minlash borasida izchil islohotlar amalga oshirilayotgani yurtimiz mudofaa salohiyatini mustahkamlashda muhim omil bo‘lib xizmat qilmoqda.

Shu munosabat bilan 7 may – “Aloqa va axborot-kommunikatsiya texnologiyalari sohasi mutaxassislari kuni” munosabati bilan Janubi-g‘arbiy maxsus harbiy okrug hamda Shimoli-g‘arbiy harbiy okrug tasarrufidagi harbiy qismlarda tantanali bayram tadbirlari tashkil etildi.

Unda so‘zga chiqqan mas’ullar mamlakatimizda axborot-kommunikatsiya texnologiyalarini rivojlantirish, harbiy aloqa tizimlarini modernizatsiya qilish hamda zamonaviy boshqaruv tizimlarini takomillashtirish yo‘lida amalga oshirilayotgan keng ko‘lamli ishlar haqida atroflicha to‘xtalib o‘tdi.

Shuningdek, harbiy aloqachilarning kecha-yu kunduz sergaklik bilan olib borayotgan xizmatlari tufayli qo‘shinlarda uzluksiz aloqa ta’minlanayotgani, jangovar shaylik yuqori darajada saqlanayotgani ham alohida qayd etildi. Zamonaviy texnologiyalarning harbiy tizimga keng joriy qilinayotgani esa Qurolli Kuchlarning imkoniyatlarini yanada oshirishga xizmat qilayotgani ta’kidlandi.

Bayram tadbirlari davomida xizmat vazifalarini sidqidildan bajarib, o‘zining fidokorona mehnati va namunali xizmatlari bilan ajralib turgan bir guruh harbiy xizmatchilar hamda Qurolli Kuchlar tizimida faoliyat yuritayotgan ishchi-xizmatchilar yuqori qo‘mondonlik tomonidan navbatdagi harbiy unvonlar, faxriy yorliqlar, tashakkurnomalar va qimmatbaho esdalik sovg‘alari bilan taqdirlandi.