“Amir Temur vorislari” harbiy-sport musobaqasining yakuniy bosqichi bo‘lib o‘tdi
2026-05-04 17:05:00 / Yangiliklar
Harbiy-akademik litseylar o‘rtasida yoshlarning jismoniy tayyorgarligi, harbiy-amaliy ko‘nikmalari hamda zamonaviy bilim va salohiyatini yuksaltirish maqsadida tashkil etilgan “Amir Temur vorislari” harbiy-sport musobaqasining yakuniy bosqichi bo‘lib o‘tdi.
Mazkur nufuzli bellashuvning final bosqichida respublika bo‘ylab saralangan 7 ta eng kuchli jamoa tarkibida jami 140 nafar shijoatli, intiluvchan va iqtidorli yoshlar ishtirok etib, o‘zaro kuch, bilim va mahoratlarini sinovdan o‘tkazdi.
Musobaqa dasturiga muvofiq ishtirokchilar 6 ta murakkab va mas’uliyatli yo‘nalishda bellashdi. Xususan, avtosport yo‘nalishida ular transport vositalarini mohirona boshqarish, tezkor va to‘g‘ri qaror qabul qilish qobiliyatlarini namoyon etdilar. Dron racing hamda robototexnika yo‘nalishlarida esa zamonaviy texnologiyalarni qo‘llash, muhandislik tafakkuri va innovatsion yondashuvlar alohida sinovdan o‘tkazildi.
Harbiy-sport ko‘pkurashi va harbiylashtirilgan estafeta bahslari yoshlarning jismoniy chiniqqanligi, chidamliligi, chaqqonligi hamda murakkab va ekstremal sharoitlarda to‘g‘ri harakatlana olish ko‘nikmalarini aniqlashga xizmat qildi. Sport ko‘pkurashi va voleybol uchrashuvlarida esa jamoaviylik, o‘zaro hamjihatlik, strategik fikrlash va sport madaniyati ustuvor ahamiyat kasb etdi.
Musobaqa jarayonlari shaffoflik va xolislik tamoyillariga qat’iy amal qilingan holda olib borildi. Har bir jamoa g‘alaba uchun so‘nggi daqiqalargacha kurash olib borib, yengilmas iroda, qat’iyat va fidoyilik namunalarini ko‘rsatdi.
Yakuniy natijalarga ko‘ra, umumjamoa hisobida quyidagi jamoalar faxrli o‘rinlarni egalladi:
— 1-o‘rin — Davlat xavfsizlik xizmati tizimidagi “Temurbeklar maktabi” jamoasi;
— 2-o‘rin — Davlat xavfsizlik xizmati Chegara qo‘shinlariga qarashli “Yosh chegarachilar” jamoasi;
— 3-o‘rin — Mudofaa vazirligining “Jaloliddin Manguberdi” nomidagi harbiy-akademik litseyi jamoasi.
Taqdirlash marosimida g‘olib va sovrindorlar diplom, medal hamda esdalik sovg‘alari bilan tantanali ravishda mukofotlandi.