O‘zbekiston Respublikasi Mudofaa vazirligi

Tadbirlar davomida mamlakatimizda harbiy xizmatchilarning ijtimoiy himoyasini ta’minlashga qaratilgan qonunlar, farmon va qarorlar, shuningdek, izchil amalga oshirilayotgan islohotlar hamda yaratilayotgan imtiyozlar mazmun-mohiyati atroflicha tushuntirilmoqda.

Mudofaa vazirligi markaziy apparatida tashkil etilgan mashg‘ulotlar mazmunan yanada boy va dolzarb mavzularni qamrab oldi. Unda harbiy intizomni mustahkamlash, huquqbuzarliklarning oldini olish, harbiy xizmatchilar hamda ularning oilalarini ijtimoiy himoya qilish, shuningdek, xizmat jarayonida qonunchilik talablariga qat’iy rioya etish masalalari keng muhokama qilindi.

Mazkur mashg‘ulotlarda ishtirok etgan sohaning yetuk mutaxassislari va tajribali ustozlar tomonidan davlat va din munosabatlari, internet va axborot makonidagi mafkuraviy tahdidlarga qarshi immunitetni shakllantirish, harbiy xizmatchilar oilalarining ma’naviy-ijtimoiy ahamiyati, shuningdek, narkotik vositalarning inson ongiga salbiy ta’siri va ularga qarshi samarali profilaktika choralari kabi dolzarb mavzular kompleks tarzda yoritib berildi. Shu bilan birga, harbiy xizmatchilarning huquqiy savodxonligini oshirish, xizmat bilan bog‘liq cheklovlar va mas’uliyatni chuqur anglash orqali mustahkam intizomni ta’minlash masalalariga ham alohida e’tibor qaratildi.

Umuman olganda, “Vatanparvarlik modeli” asosida o‘tkazilayotgan bunday mashg‘ulotlar harbiy xizmatchilarning nafaqat kasbiy tayyorgarligini, balki ma’naviy-axloqiy barqarorligini ham yuksaltirishda muhim o‘rin tutadi. Bu esa o‘z navbatida Qurolli Kuchlarda mustahkam intizom, yuksak mas’uliyat va Vatanga sadoqat ruhini yanada kuchaytirishga xizmat qiladi.