O‘zbekiston Respublikasi Mudofaa vazirligi

Dastlab, harbiy xizmatchilarga Oʻzbekiston Respublikasi mudofaa vazirining “Jangovar guruh yili” shiori ostidagi yangi oʻquv yilini boshlanishi munosabati bilan qo‘shinlarga yo‘llagan murojaati oʻqib eshittirildi.

Soʻzga chiqqanlar, oʻtkan oʻquv mavsumda erishilgan yutuqlarni eʼtirof etib, qoʻshinlarni yangi marralarni zabt etishga ruhlantirdi va yangi o‘quv yilida qoʻyilayotgan talablarni sifatli bajarilishi uchun harbiy xizmatchilarga katta ishonch bildirildi.

Bundan tashqari o‘quv yili davomida bilim va koʻnikmalarga ega boʻlishga, harbiy texnika va qurol-aslahalarni mohirona boshqarishni oʻrganib, ularni shay va soz holatda ushlab turishga, turli vaziyatlarda toʻgʻri qarorlar qabul qilish koʻnikmasini oshirishga chaqirishdi.

Taʼkidlash joizki, keyingi yillarda olib borilayotgan izchil islohotlar natijasida milliy armiyamiz har qanday xavf-xatarga munosib zarba bera oladigan qudratli, tezkor va samarali kuchga aylandi. Jangovar tayyorgarlikning modernizatsiya qilingan, moslashuvchan tizimining joriy etilishi okrug qoʻshinlarini jangovar tayyorgarligi va jangovar qobiliyatini bir necha barobarga oshirilishiga xizmat qilmoqda.

Tantanali marosimdan keyin boʻlinmalarda oʻquv yilining ilk mashgʻulotlari "Yagona Vatan, yagona xalq bo‘lib, yangi hayot va kelajak yaratamiz" shiori ostidagi vatanparvarlik ruhidagi mashg‘ulotlar bilan boshlandi. Shuningdek, dunyo va mintaqadagi harbiy-siyosiy vaziyat, harbiy intizom va harbiy xizmatchilar oʻrtasidagi oʻzaro munosabatlarni mustahkamlash, harbiy texnika va qurol-aslahalar bilan muomalada boʻlganda xavfsizlik talablariga rioya etish borasida maʼruzalar tinglanib, koʻrgazmali mashgʻulotlar tashkil etildi.

Mudofaa vazirligi Axborot va ommaviy kommunikatsiyalar departamenti