Mudofaa vazirligi qo‘shinlarida muddatli harbiy xizmatchilar Vatanga qasamyod keltirdi
2026-04-26 11:15:00 / Yangiliklar
Bugun, 26-aprel kuni Mudofaa vazirligiga qarashli harbiy qism va muassasalarida tantanali ravishda harbiy xizmatga yangi chaqirilgan muddatli harbiy xizmatchilarni Vatanga qasamyod keltirish marosimi oʻtkazildi.
Xususan, poytaxtimizdagi “Vatanga qasamyod” majmuasida oʻtkazilgan marosimda mudofaa vazirining birinchi oʻrinbosari, Qurolli Kuchlar Bosh shtabi boshligʻi general-mayor Zaynobiddin Iminov yigʻilganlar eʼtiboriga mudofaa vazirining askarlarga tabrigini oʻqib eshittirdi.
Shuningdek, O‘zbekiston Repsublikasi Harbiy prokuraturasi, Mudofaa vazirligi huzuridagi Jamoatchilik kengashi aʼzolari, davlat va jamoat tashkilotlari vakillari, ota-onalar yurt osoyishtaligi yoʻlida xizmat qilishga bel bogʻlagan oʻgʻlonlarga oʻzlarining samimiy tilaklarini bildirdilar.
Joylardagi marosimlarda Mudofaa vazirligi, harbiy okruglar va qo‘mondonliklarning masʼul ofitserlari har bir yurt oʻgʻloniga muddatli harbiy xizmat davomida ulkan zafarlar tiladi.
Asosiy tadbirdan soʻng, harbiy xizmatchilar tomonidan koʻrgazmali qoʻl jangi va jangovar chiqishlar, konsert dasturlari namoyish etildi.
Mudofaa vazirligi Axborot va ommaviy kommunikatsiyalar departamenti